ஏறக்குறைய ஒரு புனிதன்

ஜானதிபதி வாலி ஷெரிடானிடம் இருந்து பதக்கமும், ராணுவத்தில் பதவி உயர்வும் பெறும் Betty  யை சிறப்பு ராணுவ நடவடிக்கை ஒன்றிற்காக சான் மிகுவெலுக்கு வரும்படி பணிக்கிறார் ஜெனரல் காரிங்டன். சான் மிகுவெலுக்கு செல்லும் வழியில் அவர்கள் பயணம் செய்யும் விமானம் கடத்தப்படுகிறது ... அடர் காடுகளிற்குள் SPADS விசேட அதிரடிப்படை பிரிவிலிருந்து விலகிச்சென்ற ராணுவத்தினர் கைகளில் பணயக்கைதிகள் ஆகிறார்கள் ஜெனரல் காரிங்டன் குழுவினர் ...

Betty யின் பெயரை தமிழில் எழுதுவதை போல ஒரு இம்சை இல்லை. ஒன்று பெட்டி அல்லது வெட்டி என்று எழுத வேண்டும். பெட்டி நாயகியின் பெயர் என்றால் வெட்டி என XIII - Mystery - Betty Barnowsky  ஆல்பத்திற்கு பெயரை வைக்கலாம். XIII மிஸ்டரி கதைவரிசையின் இந்த ஏழாவது ஆல்பத்தின் கதையை Joel Callède ம், சித்திரங்களை Sylvain Vallée ம் உருவாக்கியுள்ளார்கள்.

ஜனாதிபதியிடமிருந்து அசாத்திய வீரச்செயல்களிற்கான பதக்கம், அதன்பின்பாக ராணுவத்திடமிருந்து வரும் பதவியுயர்வு அதன் கூடவே வரும் அதிரடி நடவடிக்கைக்கான அழைப்பு என ஆரம்பமாகும் கதை, Betty க்கும் அவள் சகோதரிக்குமிடையில் இருக்கும் முறுகிய உறவையும் காட்டுகிறது. ஏன் அந்த இணக்கமற்ற சகோதர உறவு காட்டப்படுகிறது என்பதை வாசிப்பின் முடிவில் கேள்வியாக்கினால் Betty க்கு ஆதரவாக அன்பாக யாரும் இல்லை, அவள் தோள்சாய ஒரு இடமில்லை என்பதை வாசகர்களுக்கு சொல்லவே என்பதை தவிர வேறு விடை கிடைக்கவில்லை. அதிரடி நடவடிக்கைக்கு செல்லும் முன்பாக Betty தான் கர்ப்பமாக இருப்பதையும் அறிந்து கொள்கிறாள்.

கருக்கலைப்பு என்பது Betty க்கு புதிதானது அல்ல. அதன் மூலம் அவமானங்களை அவள் வாழ்வில் சந்தித்து கடந்தே வந்திருக்கிறாள். கையில் ஒரு டாலர்கூட இல்லாது வீதிவீதியாக அவள் அலையும் ந்யூயார்க்கின் பனிவிழும் ஒரு இரவிலேயே அவள் ராணுவத்தில் இணைந்து கொள்வது எனும் முடிவிற்கு வருகிறாள். தற்கொலைக்கு பதிலாக அவள் ராணுவத்தை தெரிவு செய்து கொள்கிறாள். குடும்பமும், சமூகமும் அவளுக்கு வழங்க முடியாத ஒன்றை அவள் ராணுவத்தில் பெற்று கொள்கிறாள். அல்லது அவ்வாறான ஒரு பிரமையை அவள் தன்னுள் உருவாக்கி கொள்கிறாள். பெண்ணாக வெளியுலகில் ஒரு வாழ்வை அவளால் உறுதியாக அடையாளப்படுத்த  முடியாது போனாலும் ராணுவத்தில் பதவிகளின் உச்சங்களை தொட்டு அமரும் ஒரு வாழ்க்கை அவள் முன் இருக்கவே செய்கிறது. ஆனால் ராணுவத்தின் இன்னொரு முகத்தையும் அவள் காணும் வாய்ப்பு தென்னமரிக்க அடர்காடுகளில் அவள் அதிரடி நடவடிக்கைகளில்  முன்பு இயங்கியபோதும் பின் பணயக்கைதியாக இருக்கும்போது கிடைக்கவே செய்கிறது. ஆனால் தாய்மை என்பது பெண்களிற்கு உணரச்செய்வது வேறொன்று. அதன் அர்த்தத்தை கதையில் மேஜர் ஜோன்ஸ்,  மூன்றுமுறை கருக்களை கலைத்த அனுபவம் கொண்ட Betty க்கு அடையாளம் காட்டுகிறாள். ஜோன்ஸ் தன் வயிற்றில் பட்ட காயம் ஒன்று அவள் என்றுமே குழந்தை பாக்கியம் கிடைக்க பெறாதவளாக அவளை ஆக்கிவிடுகிறது என்பதை ஜோன்ஸ் தெரியப்படுத்தும்போது தன் கருவை கலைக்ககூடாது என்பதில் Betty உறுதியாகி விடுகிறாள்.

ஆகவே உணர்ச்சிகரமான இந்த சூழ்நிலையை சற்று எண்ணிப்பாருங்கள். கருவுற்ற ஒரு இளம்பெண், அடர்காடுகளில் தறிகெட்டு வாழும் முரட்டு மனிதர்கள் கையில் பணயக்கைதியாக! எப்படி அவள் அவர்கள் பிடியில் இருந்து தப்ப போகிறாள்? தன் கருவை அவள் எப்படி இவ்வகையான சூழலில் காப்பாற்ற போகிறாள்? இந்தக் கேள்விகளுக்கு கதாசிரியர் ஜொயெல் காலெட்டின்  கதை சொல்லும் பதில்கள் ஆழமும், அர்த்தமும் நீர்த்து போனவையாக உள்ளன. மிக உணர்ச்சிகரமாகவும், மனதை தொட்டுவிடும் வகையிலும் உருவாக்கியிருக்க வேண்டிய கதையை முரட்டு மூடர்கள் மத்தியில் அகப்பட்ட இளம்பெண்ணின் தத்தளிப்பு என்பதாக, அசட்டுத்தனமான சம்பவகோர்வைகளுடன் கதாசிரியர் வழங்கி இருக்கிறார்.

Betty யின் கருவுக்கு காரணமானவர் யார் என்பதை நண்பர்கள் இலகுவில் ஊகித்து விடலாம்.  XIII தொடரில் அதிக பெண்களை புணர்ந்தவர் யாரோ அவரே அக்கருவின் பிரம்மன். அதுகுறித்து கண்டிப்பாக அவருக்கு நினைவில் ஏதும் இல்லை. அவரின் அந்த நினைவாற்றல் மிகவும் பிரசித்தமானது என்பதை இங்கு சொல்லும் அவசியம் உண்டு. ஆனால் Betty ன் மனம் அவள் கருவுற்ற செய்தியை அறியுமுன் நாடும் உள்ளம் Armand de Preseau உடையதாக சொல்லப்படுகிறது. ஒரு இரவே அவன் மாளிகையில் தங்கினாலும் ஆர்மாண்ட் அவள்மீது பதித்த அந்த கனிவான பார்வையின் பின் அவள் உணர்ந்ததும், மெல்ல நடக்கும் தயக்கத்தின் மயக்கத்தில் புரிந்ததும் என்ன? எவ்வாறு அவள் தன் புகலிடத்தின் முகவரியை முன்னுணர்ந்தாள். அவள் விழிகள் இதயத்தின் ஆழங்களில் நீந்தும் உணர்வுகளை ஆழச்சென்று காணும் ஆற்றல் கொண்டவையா. கதைக்கு சித்திரங்களை வரைந்திருக்கும் சில்வெய்ன் வலே வரைந்திருக்கும் Bettyn விழிகளே இதற்கான பதில். அதே சமயம் கதையின் சித்திரங்கள் முழுதும் அதகளம் என்றும் இங்கு எழுதிவிட முடியாது.

ஜெனரல் காரிங்டன் பெண்டகனின் முக்கிய அதிகாரி. அவரை கடத்தி பணயக்கைதியாக்கி அமெரிக்க அரசிடமிருந்து சில விடயங்களை பெற்றுக்கொள்ள விழைபவர்கள் எப்படியான புத்திசாலிகளாக இருக்க வேண்டும். ஆனால் தென்னமரிக்காவின் அடர்காடுகளில் SPADS ஐ விட்டு விலகி வந்து ஆட்சிகவிழ்ப்பில் பங்கேற்றவர்களாக காட்டப்படும் ராணுவத்தினரிடம் புத்திசாலித்தனத்தை தவிர பாக்கி எல்லாமும் இருக்க்கிறது. குரூரம், வெறி, வக்கிரம், வன்முறை என பட்டியலிட்டால் இவற்றை எல்லாம் விஞ்சி செல்லும் முட்டாள்தனமே அவர்களிடம் கதையில் வீர்யமாக எழுந்து நிற்கிறது... இப்படியான முட்டாள்களிடமிருந்து தப்பி செல்லாவிடில் காரிங்டன் ஜெனரலாக இருந்து என்ன பயன் ஆனால் தப்பி செல்லும் முறைகளும் அதற்கான சந்தர்பங்களும், Betty ன் இளவயிறு குறிவைத்து தாக்கப்படும் தருணங்களும் கதையை ஒரு மட்டமான நாடகச்சுவைக்குள் மூழ்க வைக்கின்றன...

திருப்பங்கள் என்ற பெயரில் இக்கதையில் வருவது எல்லாம் திருப்பங்கள் என்றால் திருப்பங்களிற்கு என்ன பெயர் சொல்வதாம்?! கதையில் வரும் ஒரே மனதைதொடும் மனிதர் ஆர்மாண்ட் டெ ப்ரெஸோ மட்டுமே. ரகசியங்கள் அறியாது அன்பு செய்பவன் காதலன். ரகசியங்கள் அறிந்து அன்பு செய்பவன் ஏறக்குறைய புனிதன். ஆர்மாண்ட் டெ ப்ரெஸோ மட்டுமே Betty தன் வாழ்வில் கண்ட அற்புதம். XIII Mystery கதை வரிசையில் மீண்டும் ஒரு மொக்கை.

க்ரீன்ஃபால்ஸ் திரும்புதல்

ஆப்கானிஸ்தானின் கிழக்கே அமைந்திருக்கும் பனிசிஸ்தானில் தீவிரவாதிகளின் குகையொன்றில் கறுப்பு கரும்பு கட்டழகு இரும்பு  ஜோன்ஸை சிறைமீட்க வந்து சிறை வைக்கப்பட்டிருக்கும் மக்லேனை தம் வழிக்கு கொண்டு வருவதென்பது சிரமமான ஒன்றாகவே இருக்கும் என்பது USAFE அறியாதது அல்ல. ஆகவே அதற்காக அவர்கள் ஒரு சிறு விளையாட்டை தங்கள் ஏஜெண்ட் யூலியானா மூலம் ஆட வைப்பார்கள்.

மறதி அங்கிள் மக் அண்ட் கம்பனி சிறை வைக்கப்பட்டிருக்கும் சிறையறைக்கு வெளியே அமெரிக்காவின் வரைபடம் ஒன்று நிறுத்தப்பட்டிருக்கும். முகத்தில் மக்லேன் தழும்பு போட்டாலும் அழகைக் கீழே இன்னும் போடாத யூலியானா பெண்களை கவுரவிக்கும் வகையில் அவ்வரைபடத்தை நோக்கி கையால் வீசக்கூடிய ஒரு சிறு அம்பை வீசும்படியாக காலனல் ஜோன்ஸை கேட்பாள். சற்று தயங்கும் கறுப்பு கமலம் தன் வெண்டை விரல்களால் நிறுத்தப்பட்ட அமெரிக்காவை நோக்கி சிறு அம்பை வீசும். அந்த அம்பு சென்று தைக்கும் இடம் பெரும்பாலான அமெரிக்கர்களே அறியாத ஒரு தொலை நகராகவும் இருக்கும். இரு நாட்களின் பின் அந்நகரில் பள்ளி மாணாக்கர்களின் பேருந்து வண்டியில் ஏறும் ஒரு மனிதன் சராமாரியாக குழந்தைகளை நோக்கி துப்பாக்கியை இயக்க அச்சம்பவம் உலகெங்கும் காட்சி ஊடகங்கள் வழி பயணிக்கும். அப்பயணம் மக் அண்ட் கம்பனி சிறை வைக்கப்பட்டிருக்கும் மலைக்குகையையும் வந்து தன்னை காட்சிப்படுத்தும்.

தமது உயிரை துச்சமென மதித்து தியாகம் செய்திடக்கூடியவர்கள்தான் மக் அன்ட் கம்பனி ஆனால் அப்பாவி உயிர்கள் பலியாக தாம் காரணமாக இருக்ககூடாது என்பதிலும் அவர்கள் உறுதியுடையவர்களே. வேறு வழியின்றி யூலியானாவின் நடவடிக்கைகளுக்கு ஒத்துழைப்பு தர முன்வருகிறார் மக்லேன். இவ்வாறுதான் XIII ன் இரண்டாம் சுற்றின் மூன்றாவது ஆல்பமான Retour à Greenfalls ஆரம்பிக்கிறது. உலகமெங்கும் வெகுவாக தேடப்பட்டு வரும் நபரான மக்லேன் எவ்வாறு அமெரிக்க மண் திரும்புகிறார் என்பதற்கு நீங்கள் இப்பதிவை படிக்க வேண்டியது அவசியமில்லை பார்த்தாலே போதுமானதாகும். அவர் திரும்பும் முறையில் பல பொருட்கள் அமெரிக்க மண்ணை வந்து சேர்ந்திருக்கின்றன. USAFE அமைப்பின் செல்வாக்கு பாயும் இடங்களை கதையில் பார்க்கும்போது அவர்களிற்கு இது ஒரு சாதாரண விடயமாகவே இருக்கும். முன்னைய ஆல்பத்தை போல மக்லேன் வெகு இயல்பாக விமானநிலைய பாதுகாப்பு ஏற்பாடுகளை சிரித்தபடியே தாண்டி வரவில்லை எனும் நிம்மதியுடன் கதையை தொடர இங்கு வாய்ப்பு தரப்படுகிறது.

அதே சமயத்தில் கவர்ச்சி குண்டு Betty  அமெரிக்க மண்ணில் தன் தேடலை தொடர்கிறாள். சான் பிரான்ஸிஸ்கோ சென்று சில தகவல்களையும், நிழற்படங்களையும் சேகரிக்கிறாள். சண்டா மொனிக்காவில் NO MEN NO BRA எனும் கவர்ச்சி விடுதியில் ஜோனதன் ப்ளை பயணித்த பஸ்ஸின் ட்ரைவர் பற்றிய விபரங்களை அறிந்து கொள்கிறாள். மக்லேனுக்கு பரிசாக கிடைக்கும் ஒரு முத்தத்தையும் தன் இதழ்களில் ஏந்திக் கொள்கிறாள். காரை வாடகைக்கு எடுத்தாலும், விமானத்தை வாடகைக்கு அமர்த்தினாலும் தன் சொந்த பெயரில் உள்ள கடன் அட்டையை பயன்படுத்திக் கொள்கிறாள். இது FBI ன் கணிணிகளில் வந்து விழுந்து கொண்டே இருக்கிறது. வழமைபோலவே உள்ளூர் காவல்துறையிடமிருந்து பெரும்பாலான சமயங்களில் பெட்டி தப்பி செல்கிறாள். அவளை கோட்டை விட்ட FBI ஏஜெண்டுகள் உள்ளூர் பொலிசாரின் திறமையின்மையை விமர்சித்தவாறே தங்கள் கோட் சூட் மீது கெட்ச்சப் கொட்டாதவாறு பர்கர் சாப்பிட்டு பெட்டியை தேடி ஓடி மீண்டும் அவளை கோட் சூட் கசங்காது கோட்டை விடுகிறார்கள். இக்கதை FBI மற்றும் அமெரிக்க புறநகர் பொலிசாரை கிண்டல் அடிக்கும் நோக்கம் கொண்டதா எனும் சந்தேகம் எழுவது இவ்வகையான சமயங்களில் இயல்பான ஒன்றாகி விடுகிறது.

அமெரிக்க மண் வரும் மக்லேனுக்கு சில ஆச்சர்யங்கள் காத்திருக்கின்றன. அவர் நாடிச் சென்ற உளவியல் மருத்துவியான சூசான் லெவின்சன் USAFE உடன் சேர்ந்து பணியாற்ற வேண்டி அழுத்தம் தரப்பட்டிருப்பதை அவன் அறிகிறான். சூசானும் அவள் தந்தையும் இணைந்து நடத்தும் பரிசோதனைகளால் நினைவுக்கு கொண்டு வரமுடியாதிருந்த தன் கடந்தகாலத்தின் பகுதிகளுக்கு மீண்டும் செல்ல ஆரம்பிக்கிறான் மக்லேன். கதையின் இந்த ஆல்பத்தில் ஏன் USAFE  மக்லேனின் நினைவுகளை துழாவி மீட்க விரும்புகிறது என்பது தெளிவாக்கப்படுகிறது. மேஃப்ளவர் கப்பலில் பயணித்தவர்களிற்கிடையே ஏற்பட்ட சில விரும்பதகாத நிகழ்வுகள், அவை எவ்வாறு காலம் காலமாக ஒரு தேடலை முக்கியமானதாக ஆக்கின, இத்தேடலிற்கும் மக்லேனிற்கும் இடையில் உள்ள தொடர்பு என்பன கதையின் ஓட்டத்தில் அம்பலமாக்கப்பட்டு விடுகின்றன. மக்லேன் இன்னும் ஓட வேண்டும் என்பதை கதை சொல்லாமல் சொல்கிறது. அதற்கேற்ப மக்லேனும், பெட்டியும் தனித்தோ அல்லது சேர்ந்தோ ஓடுகிறார்கள். அதிரடிப்படை நுட்பங்களை உபயோகிக்கிறார்கள். ரகசியமொன்றினை அறிய க்ரீன்பால்ஸ் திரும்புகிறார்கள். ஷெல்பர்ன் குடியிருப்பு அமெரிக்க பூர்வகுடிகளை அமெரிக்க இனவாதத்திலிருந்து மீட்கிறார்கள். அவர்கள் தேடி வந்த ரகசியம் அவர்கள் கைகளுக்கு வருவதற்காக அவர்கள் சில காயங்களை தாங்கிக் கொள்கிறார்கள்.

முடிவாக மேலும் ஒரு முடிச்சுடன், மக்லேன் ஓட வேண்டி இருக்கிறது. புனித ஆண்ட்ரு அனாதைவிடுதியில் சிறுவயது மக்லேனை தேடி வந்து க்ரீன்ஃபால்ஸிற்கு அழைத்து சென்ற அம்மனிதனைத் தேடி, USAFE க்கு எதிராக இயங்கும் வேறு அமைப்புக்களை தேடி வாசகர்களும் ஓட வேண்டிய நிலைக்கு கதையின் இறுதியில் தள்ளப்படுகிறார்கள். வழமையான XIII கதை வரிசைக்குரிய ஆழமற்ற கதைசொல்லல், தர்க்கமற்ற சம்பவ கோர்வைகள் எனும் பராம்பரியம் கடைப்பிடிக்கப்பட்டாலும் கதை விறுவிறுப்பாகவே நகர்கிறது. சித்திரங்களில் ஜிகுனோவ் சந்தேகமேயில்லாமல் அடி பின்னி இருக்கிறார். அழகுகளின் மார்பழகுகளை காட்சியாக்கும் வழக்கம் இரண்டாம் சுற்றில் இல்லை என்பதும் கதையில் தெளிவாகிறது. XIII ல் புதுமையான ஆச்சர்யங்களை அறிமுகம் செய்யமாட்டார்களா எனும் கேள்விக்கு இந்த ஆல்பமும் பிடிவாதமாக எதிர்மறை பதிலொன்றையே தந்து நிற்கிறது.

ஜோன்ஸ் வடை !

முன்பெல்லாம் வீட்டில் எலித்தொல்லை அதிகமாகும்போது எலிப்பொறி எனும் அழிவாயுதத்தின் உதவியை நாடிச் செல்வதென்பது வழக்கமான ஒன்றாக இருந்தது. எலிப்பாசனங்கள் எனும் ரசாயான ஆயுதம் அறிமுகமாகியது எலிப்பொறியின் செயற்திறனில் எலியினவழிப்பாளர்களின் நம்பிக்கை குறைவடைய ஆரம்பித்த வேளையிலேதான். மேலும் எலிப்பொறியில் எலியைக் கவர அதற்கு பிடித்த ஏதாவது ஒன்றை லாகவமாக பொருத்தி பொறியை இழுத்துவிட வேண்டும். தேங்காய் துண்டு, வடையின் ஒரு பகுதி போன்றன நம்மூரில் எலிகளிற்கு பிடித்த விடயங்களில் முன்னணியில் இருந்தன. மேற்குலகில் இவற்றிற்கு பதிலாக பாற்கட்டி. இருப்பினும் எலிகளிற்கு புத்தகங்களையும் பிடிக்கும். ஆனால் அவற்றை யாரும் பொறிகளில் வைத்ததாக நான் அறிந்தது இல்லை. இப்படி பொறிகள் வைத்தாலும் அகப்படாது தண்ணி காட்டும் எலிகள் உண்டு. எல்லாப் பொறிகளையும், ரசாயனங்களையும், பூனை போன்ற உயிராயுதங்களையும் தாண்டி வென்று இயற்கை மரணத்தை ஹெமிங்வே எழுதிய நூலொன்றை சுவைத்தபடியே இறந்துபோன எலிகள் வரலாற்றில் உண்டு. மக்லேன், ஹெமிங்வேயை படித்ததாக வான்ஹாம் எழுதியது இல்லை ஆனால் எல்லா வகையான பொறிகளையும் சமார்த்தியமாக கடந்து வெல்லும் ஒரு எலியாக நாம் மக்லேன் மாமா அவர்களை உருவகப்படுத்தலாம்.

எனவே தங்கள் கைகளில் சிக்காது எஸ்கேப்பாகி இயற்கையில் கலந்துபோன மக் மாமாவை அவர் ஒளிந்திருக்கும் இடத்திலிருந்து வெளிக்கொணர வேண்டுமாயின் அவரிற்கு பிடித்தமான ஒரு பொருளை பொறி ஒன்றில் வைத்தால் போதும் என்பதுதான் XIII - L'Appat  கதையில் USAFE அமைப்பு பிரயோகிக்கும் ராஜதந்திரம். மக்லேன் மாமாவிற்கு பிடித்த பொருள் என்னவென்று தேடியதில் அவர்களிற்கு விடையாக கறுப்பு வைரம் ஜோன்சையும், பொறியை வைக்குமிடம் எது என்பதற்கு பதிலாக ஆப்கானிஸ்தானையும் கதாசிரியர் ஈவ்ஸ் செண்ட் வழங்கியுதவியிருக்கிறார்.

தனக்கு மிகவும் பிடித்தமான காலனல் ஜேம்ஸ், கொடிய தலீபான்கள் கையில் அதுவும் ஒற்றைக்கண்ணுடைய ஒருவரை தலீபான் அணி தலைவராக கொண்ட ஒரு குழுவின் பிடியில் மாட்டிக் கொள்ளும்போது, தலீபான்களும் வீடீயோ கமெராக்கள் வழியாக பயணக் கைதிகள் சிலரின் தலைகள் உருளுவதை வெளியுலகிற்கு அனுப்பி வைக்கும்போது, தன் உயிரிற்கு நெருக்கமான ஜோன்சை மீட்க ஓடிச் செல்கிறார் மக்லேன். மக்லேனை இந்த திட்டத்திற்குள் இழுக்கும் கயிறாக ஜெனரல் காரிங்டன். கதையின் இன்னொரு தளத்தில் Betty மக்லேன் கேட்டுக் கொண்ட சில ரகசியங்களையும், தகவல்களையும் கண்டறிய பயணிக்கிறாள். அவளை அமெரிக்க காவல்துறை, FBI, மற்றும் ஒரு மாஃபியா குழு துரத்துகிறது.

பிரான்சிலிருந்து எந்த சிக்கலுமில்லாது பாகிஸ்தான்
சென்றிறங்கி அங்கிருந்து உள்ளூர் நபர்களின் உதவியுடன் பனிசிஸ்தான் எனும் தலீபான்களின் மலைகோட்டை குகைக்குள் - இங்கு ஆப்கானிஸ்தானும் சரி பாக்கிஸ்தானும் சரி ஏன் அமெரிக்க படைகளும் சரி நெருங்கவே முடியாதாம் - காரிங்டனுடன் நுழைந்து அது USAFE ன் சதி என்பதை மக் மாமாவும், காரிங்டனும் அறிந்து கொள்ளும்வரை கதை என்பது நகைப்பிற்கிடமாகவே இருக்கிறது.  வழமைபோலவே தர்க்கம் எல்லாம் பார்க்காது கதையை படித்திட வேண்டியது ஒன்றுதான் வழி. அதேபோல தனியாளாக Betty நிகழ்த்தும் சாகசங்களை விழுங்கி கொள்ள திமிங்கலமாக இருந்தால் மட்டுமே முடியும். இவ்வளவு வருடமாக இக்கதையை படித்துக் கொண்டு வரும் ஒரு வாசகன் கதையில் இன்னம் கொஞ்சம் நம்பகத்தன்மையுள்ள களத்தையும், நிகழ்வுகளையும், சம்பவங்களையும் சிறிது புத்திசாலித்தனத்தையும் எதிர்பார்த்தால் அது இங்கு கிடைக்காது வேறிடம் பாருங்கள் என அடித்துக் கூறுகிறார் கதாசிரியர் ஈவ் சென்ட்.

ஆப்கானிஸ்தானில் அருமையான ப்ரியாணி ஒன்றை மக் மாமாவிற்கு அறிமுகப்படுத்தும் காரிங்டன், ஜோன்ஸ் தப்பிக்க வசதியாக பாரசூட்டை அவர் தப்பிச் செல்லும் வழியில் வைத்த தலீபான்கள், என் தண்ணீர் பாட்டிலிற்குள் இருப்பது நைட்ரோ கிளிசரின் என மிரட்டி தலீபான்களை நம்ப வைக்கும் காரிங்டன்-- இந்த தலிபான்களைத்தான் ஆப்கானிஸ்தான், பாக்கிஸ்தான் மற்றும் அமெரிக்க படையினரால் நெருங்கவே முடியவில்லை!!-- தன்னை பலர் பின் தொடரக்கூடும் என்பது குறித்து அதிகம் அலட்டிக் கொள்ளாது மதுவை சுவைத்தபடியே உள்ளாடைகளுடன் ரிலாக்ஸாக ஸாக்காரியாஸ் காத்தவேயின் டைரியை படிக்கும் Betty, இப்படியாக செமையான காமெடிகள் இந்த ஆல்பத்தில் உண்டு.  மேலும் மக்லேன் முக்கியமான ஒரு பொருளை மறைத்து வைத்த டோரதி எனும் பூனை மேஃப்ளவர் எனும் அந்தக் கப்பலின் மாதிரியாக உருவாக்கப்பட்ட கப்பலில் Betty க்காக காத்திருப்பது.... என்ன ஒரு குறியீடு. பின்னிட்டாங்க.

ஒரே ஒரு ஆறுதல் ஜிகுனோவின் சித்திரங்கள். பனிசிஸ்தான் மலைப்பகுதிகளில் அவர் வரைந்து வழங்கியிருக்கும் காட்சிகள் அருமையாக இருக்கின்றன. அவர் சித்திரங்கள் நவீன நுட்பங்களுடன் மெருகேறியிருக்கிறது என்பது தெளிவு.

ஆப்கானிஸ்தானிலேயே மக் மாமாவிற்கு பொறி வைத்த USAFE அவனை தன் பக்கம் இழுத்திட எடுத்திடப் போகும் நடவடிக்கைகளுடனும், மக்லேன் கேட்டுக் கொண்ட தகவல்களை அறிய ரயிலில் பயணிக்கும் Betty யின் புதிர்கள் கோலமிட்ட முகத்துடன் விரையும் ரயிலின் முகத்துடனும் நிறைவு பெறும் இரண்டாம் சுற்றின் இரண்டாம் ஆல்பத்தினை வாசித்து முடிக்கையில் எம் முகத்தில் பூத்திருக்ககூடியது முட்டாள் களை மாத்திரமே !!

மேன்மைதகு மேஃப்ளவரின் நாள் - XIII - 20

XIII ன் முதலாவது ஆல்பமான கறுப்பு சூரியனின் நாளினது அட்டைப்படத்தினையும் அதன் இருபதாவது ஆல்பமான மேஃப்ளவரின் நாளினது அட்டைப்படத்தினையும் ஒரு துவிச்சக்கர சிற்றிடைவெளி தந்திடும் அவகாசத்தில் ஒப்பிட்டு பார்த்திடுவோமேயானால், அவ்விரு ஆல்பங்களிற்கும் இடைப்பட்ட 27 வருடங்களின் தடமானது மக்லேன் மாமாவில் அழகான முதிர்ச்சியாக உருப்பெற்றிருப்பது பட்டென உறைக்கும்.

பணப்பெட்டிக்கு முன்பாக ஐயமும் ஆச்சர்யமும் கலக்கிய பார்வையுடன் உத்தரத்திலிருந்து தொங்கி வழியும் ஒளியின் கசிவில் அதிரடிக்குள் தன்னை இறக்கி கொள்ளவிருக்கும் மக்லேனையும் அவனை சுற்றியிருக்ககூடிய மர்மங்களையும் கேள்விகளையும் கறுப்பு சூரியனின் நாளினது அட்டைப்படமானது மங்கிய இருள் தன் தடத்தினுள் பொதித்து வைத்திருக்கும் ரகசியங்களின் கசியலாக ஒழுகவிட்டுக் கொண்டிருக்கிறது. XIII தொடரின் அறிமுகமற்ற வாசகன் ஒருவன் அறிந்திராத மக்லேனின் வாழ்க்கைபோல மக்லேனின் முகம் மங்கிய ஒளி தூவும் அந்த இருளில் சற்று நனைந்திருக்கிறது. பத்தொன்பது ஆல்பங்களின் கதை சொல்லல் வழியே மக்லேன் தான் யார் என்பதனை அடையாளம் கண்டபோதிலும் அவன் நினைவுகள் முற்றாக அவனிடம் திரும்பி வந்திடவில்லை. மக்லேன் தன் நினைவுகளை தேடும் வேட்டையின் ஆரம்பமாக வெளியாகியிருக்கும் இருபதாம் ஆல்பமான மேஃப்ளவரின் நாளின் அட்டைப்படத்தில் மக்லேன் மாமா ஷோக்காகத்தான் இருக்கிறார்.

பணப்பெட்டிக்கு பதிலாக பக்குவமானதொரு மடிக்கணிணி. கால்சட்டை பைகளிற்குள் நுழைத்திட்ட கைகள். பிரகாசம் ததும்பும் மக்லேன் மாமா வதனத்தில் புதியதொரு அதிரடிப் பயணத்திற்கு தயாரான உறுதி. அப்பயணத்தின் மிக முக்கியமானதொரு புள்ளியாக இருந்திடக்கூடிய மேஃப்ளவர் கப்பல் அலைகள் ஆவேசமாய் நுரைத்து ததும்பும் கடலில் சற்று சரிந்தே நிற்கும் நிலை. கருமை சூல் கொண்டு உடன் பிரசவிக்க பரிதவிக்கும் வானம். யாவும் வாசகர்களை எதிர்பார்க்க வைக்கிறது. என்னவாக இருக்கலாம் என கேட்க தூண்டுகிறது. மேலுள்ள இரு அட்டைப்படங்களிலும் உள்ளது வில்லியம் வான்ஸின் கையொப்பம்தான், இருபதாம் ஆல்பத்திற்குரிய அட்டைப்படத்தையும் அதில் ஒரிரு பக்கங்களையும் நட்புக்காக வரைந்து தந்திருப்பவரும் வான்ஸ்தான். ஆனால் புதிய தொடரிற்கு கதை மற்றும் சித்திரங்கள் வான்ஸ், வான்ஹாம் கூட்டணி அல்ல. புதிய அணிதான். கதைக்கு பொறுப்பாக Yves Sente. சித்திரங்களிற்கு பொறுப்பாக Youri Jigounov.

ஈவ்ஸ் சென்ட்டிற்கு வான் ஹாம் ஆரம்பித்து வைத்து விலகிச் சென்ற காமிக்ஸ் தொடர்களை தன் கையில் பொறுப்பேற்பது என்பது புதிதல்ல. வான் ஹாமின் Thorgal தொடரை அவர் பொறுப்பு ஏற்று இதுவரை நான்கு ஆல்பங்களில் பணியாற்றியிருக்கிறார். இப்போது XIII அவர் கைகளிற்குள் வந்திருக்கிறது. Blake and Mortimer, Le Janitor ஆகிய பிரபலமான தொடர்களில் பணியாற்றியிருக்கிறார். இதில் Le Janitor அவர் கற்பனையில் உருவாகிய தொடராகும். யூரி ஜிகுனொவ் Alpha எனப்படும் சமகால உளவுத்தொடரிற்கு வரைந்த சித்திரங்கள் மூலம் பிரபலமானவர். ஈவ்ஸ் செண்ட் லொம்பார்ட் பிரசுரத்தின் ஆசிரியர் குழுவின் முக்கியமான பொறுப்பில் இருந்தபோது மொஸ்கோவில் இருந்து வந்த யூரி ஜிகுனொவ்வில் ஒரு நல்ல கலைஞனைக் கண்டுகொண்டு அவரை உள்ளெடுத்துக் கொண்டார். ஆல்பாவின் அசத்தல் ஓவியங்கள் ஜிகுனொவ்வின் திறமைக்கு சான்றாக திகழ்கின்றன. காமிக்ஸ் ரசிகர்களால் அதன் அழகிற்காக பெரிதும் விரும்பப்படுகின்றன.

கடலிற்கும் மக்லேனிற்கும் நெருங்கிய தொடர்பு உண்டு. நினைவிழந்த நிலையில் கடற்கரையில்தான் மக்லேனின் கதை ஆரம்பித்தது. அவனைக் காப்பாற்றிய ஏப் மற்றும் சலி ஸ்மித் தம்பதியினர் வாழ்ந்திருந்த அதே Bar Harbor கடற்கரை வீட்டில் வசிப்பவனாக கதையில் அறிமுகமாகிறான் மக்லேன். தன்னால் மீட்டப் படமுடியா நினைவுகளை மீட்டெடுக்க அவன் உளவியல் மருத்துவரும் அட்ரா சக்க எனச் சொல்லக்கூடிய அழகை கொண்டவருமான டாக்டர் சூசான் லெவின்சனிடம் ஆலோசனைகளை பெற்றுக் கொள்கிறான். சூசான் லெவின்சனிற்கு மக்லேன் மாமாமேல் ஒரு ஈர்ப்பு இருப்பதாக காட்டப்படுவதன் மூலம் எதிர்வரும் ஆல்பங்களில் ஒன்று அவர் தியாகச்சாவையோ அல்லது பயங்கரமான துரோகத்தையோ நிகழ்த்துபவராக மாறிடலாம் என்பதை வாசக மனம் உருச்செய்யலாம். மக்லேனிற்கு மச்சம்ம்பா. அனுபவிக்க போகிறார். ஆனால் பாவம் இந்த ஆல்பத்தில் அனுபவிக்க கதை அவரை விடவில்லை.

உளவியல் டாக்டர் சூசான் அத்துறையில் பிரபலமான புரபசர் டக்ளஸின் சிகிச்சை மூலமாக மக்லேனிற்கு விமோசனம் கிடைக்குமா என முயல ஆரம்பிக்கும் அதே வேளையில் சூப்பர் பிகருப்பா இது எனக்கூறிடும் வகையில் அழகான சிட்டு, அல்வாவில் செய்த மொட்டு யூலியானா, கடற்கரை வீட்டில் மக்லேனை வந்து சந்திக்கிறார். தம் ரகசிய அமைப்பில் இணைந்து கொள்ளுமாறு மக்லேனை நட்புடன் அழைக்கிறார். ஆனால் மக்லேன் அந்த அழைப்பை ஏற்க மறுக்கவே யூலியானா அங்கம் வகிக்கும் USAFE எனப்படும் அமைப்பை சேர்ந்தவர்களால் மக்லேன் மாமாவின் நடவடிக்கைகள் கண்காணிக்கப்படுவது தொடர்கிறது. அவன் தொலைபேசி உரையாடல்கள் ஒட்டுக் கேட்கப்படுகின்றன. எவ்வழியிலாவது மக்லேனை தம் அமைப்பிற்குள் இணைத்துக் கொள்ள வேண்டும் எனும் ஒரு தீவிரத்துடன் செயற்படுகிறார்கள் USAFE குழுவினர்.

புரபசர் டக்ளஸ் பெரியமனது வைத்து மக்லேனிற்கு சிகிச்சை தர முன்வருகிறார். மக்லேனின் மூளையில் மின் தூண்டல் மூலம் அவன் மறந்து போன நினைவுகளை மீட்க முடியுமா என அவர் முயல்கிறார். அவர் சிகிச்சையில் ஒரு சிறிய வெற்றி கிடைக்கிறது. மக்லேனிற்கு அவன் பால்ய கால நண்பனான ஜிம் ட்ரேக் என்பவன் பற்றிய சில நினைவுகள் திரும்புகின்றன. மதுவிடுதி ஒன்றில் தன் கவர்சியான மார்புகளை காட்டியவாறு நிற்கும் பரிசாரகியினை சட்டை செய்யாது புட்வெய்சர் பீரைக் குடிக்கும் மக்லேன், பின் தன் மீனவ நண்பன் ஒருவனின் உதவியுடன் பேஸ்புக்கில் ஜிம் ட்ரேக்கை தேடி, கண்டு பிடித்தும் விடுகிறார். ஜிம் ட்ரேக்கை தொடர்பு கொள்ளும் மக்லேன் அவனை சந்திக்க தான் ஆவலாக உள்ளதை தெரிவிக்கிறான். ஜிம் ட்ரேக்கும் அதே மனநிலையில் இருப்பதை கதையின் ஓட்டம் தெளிவாக்குகிறது. ஆனால் மக்லேன் மாமாவிற்கு அவரின் கடந்தகால நினைவுகள் திரும்பிவிடக்கூடாது என்பதில் மிக உறுதியாக இருக்கும் USAFE தன் அதிரடி நடவடிக்கைகளில் இறங்குகிறது…. பென்டகனும், FBI யும் மக்லேனை தீவிரமாக தேடும் வகையில் அது சதிகளை நிகழ்த்த ஆரம்பிக்கிறது….. கொலைக்குற்றம், மனநிலைபிறழ்ந்தவன் இவ்வகையான அபாண்டங்களை சுமந்து கொண்டு தன் நினைவுகளை மீட்க ஓட ஆரம்பிக்கிறான் மக்லேன்…. அடுத்த கட்ட ஓட்டம் ஆரம்பம். இந்த ஓட்டம் எத்தனை ஆல்பம் நீடிக்கும் என்பது வசூலிற்கே வெளிச்சம்.

மெய்னிலிருக்கும் அகுஸ்டாவில் ஆரம்பமாகும் கதை, ப்லிமுத், அரிசோனா பாலைவனம், பிரான்ஸின் அழகிய கிராமப்புறம், மேன்ஹாட்டன் என வேகம் பிடிக்கிறது. ஒவ்வொரு நிலப்பரப்பினதும் அழகை ஜிகுனொவ்வின் சித்திரங்கள் அழகுடன் தீட்டிச் செல்கின்றன. இந்த ஆல்பத்தின் மிகப்பெரிய பலம் ஜிகுனொவ்வின் சித்திரங்கள்தான். வான்ஸ் தந்த வரிகளை அப்படியே தத்தெடுத்தாலும் தன் பாணியில் அருமையாக இந்த ஆல்பத்திற்கான சித்திரங்களை ஜிகுனொவ் வழங்கியிருக்கிறார். இத்தொடரை இளமையாக கொண்டு செல்ல அவர் கைத்திறன் நிச்சயம் கைகொடுக்கும். கதையில் வரும் சிட்டுக்களை அவர் கவர்சியுடனும் அழகுடனும் படைத்திருக்கிறார். ஆனால் டார்கோட் படுபாவிகள் ஒரு சிட்டைக்கூட எதையும் காட்ட விடவில்லை. சூசானாவின் பாதங்களையும், யூலியானாவின் த்த்த்த்த்திரண்ட தயிர் போன்ற மார்பகங்களின் வெட்டையும் காட்டினால் மட்டும் போதுமா. ஆல்பத்தின் எட்டாம் பக்கத்தில் மேஜர் ஜோன்ஸ் கவர்ச்சி உடையுடன் கட்டிலில் சரிந்திருந்தவாறு மக்லேனிற்கு ஒரு தகவல் விடுப்பார். அழைப்பு எனலாம். எதற்கு எனக் கேட்டால் நீங்கள் உண்மையிலேயே நல்ல மனிதர்தான். வழமைபோலவே மக்லேனின் உலகம் அழகான பெண்களால் சூழப்பட்டிருக்கிறது.

ஆனால் கொலைஞர்களின் உலகம் அழகிய பெண்களால் நிறைந்திருக்கிறது. அறிமுகமாகும் USAFE குழு ஒவ்வொன்றிலும் அழகிய கொலைஞி ஒருவர் இருக்கிறார். ஏன் மக்லேனை தன் பக்கம் இழுத்துவிட இந்த அமைப்பு துடிக்கிறது என்பது கதையில் படிப்படியாக தெளிவாகிறது. இங்குதான் மேஃப்ளவர் கப்பலின் வரலாறு முக்கியமான ஒன்றாக ஆகிறது. அது என்ன என்பதை கதையிலேயே நண்பர்கள் படித்து தெரிந்து கொள்ளலாம். அதற்கும் மக்லேன் மாமாவின் கதைக்கும் உள்ள தொடர்பு என்ன என்பதுதான் இந்த ஆல்பத்தின் முக்கியமான மர்மமாக இருக்கிறது. கதையை தொய்வில்லாமல் சொல்லியிருக்கிறார் ஈவ்ஸ் செண்ட். ஆனால் புதுமையான மாற்றங்கள் ஏதுமின்றி XIII மரபை அவர் தவறாது தொடர்ந்து வந்திருக்கிறார். ஜெனரல் காரிங்டன், மேஜர் ஜோன்ஸ், பெட்டி போன்றவர்கள் கவுரவ வேடத்தில் வருவது போல் வருகிறார்கள். பெண் கொலைஞிகளின் மனதிலோ அல்லது முகத்திலோ தழும்புகளை உருவாக்க மக்லேன் தவறுவதில்லை. இந்த ஆல்பத்திலும் அது உண்டு. இன்னொரு இரினா.

இந்த ஆல்பத்தில் வண்ணம் வழங்கும் பணியை செய்த Bérengère Marquebrecuq பாராட்டப்பட வேண்டியவர். கண்களிற்கு கவர்ச்சியான விருந்தாக அமைந்திடும் வண்ணம் சித்திரங்களிற்கு அவர் வண்ணங்களை தெரிவு செய்திருக்கிறார். அதிரடிகள் அதிகம் இல்லாத அதே போல் அலட்டல்கள் அதிகம் இல்லாத ஆல்பம் இது. பெண் கொலைஞிகள் உறுதியான பாத்திரங்களாக சித்தரிக்கப்படும் ஆல்பம் இது. வான்ஹாம்ன், வான்ஸ் அணி விட்டுச் சென்ற பணியை XIII ன் பாரம்பரியத்தை புதிய அணி செவ்வனே செய்திருக்கிறது. XIII ன் இருபதாவது ஆல்பம் நல்லதொரு ஆரம்பம். டார்கோட் ஈட்டிய வசூலிற்கு. மக்லேன் மாமாவின் கம்பேக்கிற்கு. [***]

மான்டோகிறிஸ்டோ மர்மம்

சர்வதிகார ஆட்சிகளாலும், அதன் பின் நிகழ்ந்த கப்சா புரட்சிகளாலும் அல்லல்பட்ட தென்னமெரிக்காவின் சிறு நாடுகளில் ஒன்று கொஸ்டா வேர்ட். NSAயின் இயக்குனன் ஜியோர்டினோவின் கொடூரக் கொலைஞர்களின் சதிப்பொறிகளிலிருந்து வெற்றிகரமாகத் தப்பிக்கும் மக்லேன், அமெரிக்காவை நீங்கி தன் முன்னாள் காதலி[மனைவி!] மரியா ஜனாதிபதியாகவிருக்கும் கொஸ்டா வெர்ட் நாட்டை வந்தடைகிறான்.

கொஸ்டா வெர்ட் நாட்டின் அண்டை நாடான சன் மிகுவெலில் தஞ்சம் புகுந்திருந்த ஜெனரல் காரிங்டன், மேஜர் ஜோன்ஸ், கேணல் ஏமஸ் ஆகியோர் அங்கு நிகழ்ந்து விட்ட எதிர்பாராத அசம்பாவிதங்களினால் கொஸ்டா வெர்ட் நாட்டில் மக்லேனிற்கு முன்பாகவே வந்து தஞ்சம் அடைந்திருக்கின்றனர்.

தாங்கள் தேடும் மக்லேன் கோஷ்டி, கொஸ்டா வெர்ட்டில் தங்கியிருப்பதை அறிந்து கொள்ளும் அமெரிக்க அரசு உடனடியாக அவர்களை தங்களிடம் ஒப்படைக்கும்படி கொஸ்டா வெர்டின் ஜனாதிபதி மரியாவிடம் கேட்டுக் கொள்கிறது. மக்லேன் கோஷ்டியுடன் கொஸ்டா வெர்டில் சிறை வைக்கப்பட்டிருக்கும் காலஞ் சென்ற சர்வதிகாரி ஓர்ட்டிஸின் ஆசைநாயகி, அம்சமான அழகி பெலிசிடி பிரவுனையும் தங்களிடம் ஒப்படைக்க வேண்டுமெனவும் அமெரிக்க அரசு வேண்டுகிறது.

தங்கள் வேண்டுகோளை நிறைவேற்றத்தவறும் பட்சத்தில் கொஸ்டா வெர்ட் நாட்டிற்கு எதிராக கடுமையான பொருளாதாரத் தடைகளை அமெரிக்கா அமுலிற்கு கொண்டு வரும் எனவும் மரியாவிற்கு அமெரிக்க அரசு எச்சரிக்கை செய்கிறது.

தன் நாட்டினை மேலும் சிக்கலுக்குள் மாட்டி வைக்க விரும்பாத மரியா, அமெரிக்காவின் வேண்டுகோளிற்கு இணங்க அவர்கள் கேட்ட நபர்களை கொஸ்டா வெர்டிலிருக்கும் அமெரிக்க தூதரக அதிகாரிகளிடம் ஒப்படைக்கச் சம்மதிக்கிறாள்.

ராணுவச் சிறையொன்றில் கைது செய்து வைக்கப்பட்டிருந்த மக்லேன் கோஷ்டி மற்றும் பெலிசிடி பிரவுன் ஆகியோரைக் சளைக்காமல் கொட்டும் மழையில் பலத்த ராணுவப் பாதுகாப்புடன் அமெரிக்க அதிகாரிகளிடம் ஒப்படைக்க எடுத்துச் செல்கிறார்கள் கொஸ்டா வெர்ட் வீரர்கள். செல்லும் வழியில் இனம் தெரியாத ஆயுததாரிகளால் மக்லேன் கோஷ்டியும், பெலிசிட்டி பிரவுனும் கடத்தப்பட்டு விடுகிறார்கள்.

தங்களை ஒர் பழிவாங்கும் குழுவாக அடையாளம் காட்டிக்கொள்ளும் இனம் தெரியாத ஆயுததாரிகள், தாங்கள் கடத்திச் சென்றவர்களை விடுவிக்க வேண்டுமானால் அதற்குப் பதிலாக பெருந்தொகைப் பணம் பணயத்தொகையாக தங்களிற்கு தரப்பட வேண்டும் என அமெரிக்க தூதரகத்திடம் வேண்டுகோள் விடுக்கிறார்கள். இதனை அறிந்து கொள்ளும் மரியா கடத்தப்பட்டவர்களை தேடுவதற்கான நடவடிக்கைகளில் தன் வீரர்கள் உடனடியாக இறங்குவார்கள் என அமெரிக்கத் தூதுவரிடம் தெரிவிக்கிறாள்.

மக்லேன் கோஷ்டியைக் கடத்திச் சென்ற ஆயுததாரிகள் தங்கள் நிஜ முகத்தை அவர்களிற்கு வெளிப்படுத்தும் போது ஆச்சர்யத்தால் அதிர்ந்து போகிறது மக்லேன் கோஷ்டி. கொஸ்டா வெர்டில் தங்களிற்கு நெருக்கமானவர்களின் அட்டகாசமான ஏற்பாட்டில் நடைபெற்ற நாடகம்தான் இந்தக் கடத்தல் நடவடிக்கை என்பதையும் அக்கோஷ்டி அறிந்து கொள்கிறது.

மாண்டோகிறிஸ்டோ அணைக்கு அருகில், செயற்கை ஏரி ஒன்றின் நெருக்கத்திலுள்ள ஒர் தங்குமிடத்திற்கு மக்லேன் கோஷ்டியை அழைத்துச் செல்கிறார்கள் அந்த ஆயுததாரிகள். இயற்கையின் எழில் காதலுடன் ஆக்கிரமித்திருக்கும் அப்பகுதியில் அவர்களை எதிர்பார்த்து ஆவலுடன் காத்திருக்கிறான் ஷோன் முல்வே. மக்லேன் கோஷ்டி ஏரிப்பகுதியில் சுதந்திரமாக உலாவ ஆரம்பிக்க பெலிசிடி பிரவுன் மட்டும் ஆயுததாரிகளினால் தனியாக அடைத்து வைக்கப்படுகிறாள்.

இவ்வளவு நாட்களாக கொஸ்டா வெர்டில் தான் தேடி அலைந்து கொண்டிருந்த ஓர் ரகசியம் குறித்து மக்லேன் கோஷ்டிக்கு விளக்கும் ஷோன், அந்த ரகசியம் மண்டோகிறிஸ்டோ ஏரியில், ஐம்பது மீற்றர் ஆழத்தில் அமிழ்ந்திருக்கிறது எனும் தகவலை தான் கண்டுபிடித்துவிட்டதையும் அவர்களிடம் கூறுகிறான். இதேவேளை தனியாக சிறை வைக்கப்படிருந்த பெலிசிட்டி, தன் கவர்ச்சியால் ஒர் காவல் வீரனை மயக்கி அங்கிருந்து தப்பித்துச் சென்று விடுகிறாள்.

ஆயுததாரிகளிடமிருந்து தப்பிய பெலிசிட்டி நேரடியாக கொஸ்டா வெர்டின் CIA பொறுப்பதிகாரி ஸ்பென்ஸரிடம் தஞ்சமடைகிறாள். தனக்குப் பணமும், பாஸ்போர்ட்டும் சிஐஏ தந்து உதவுமானால் மக்லேன் கோஷ்டியின் இருப்பிடத்தை தான் காட்டித்தருவதாக அவள் ஸ்பென்சருடன் பேரம் பேசுகிறாள். பெலிசிட்டியின் பேரத்தை ஸ்பென்ஸர் ஏற்றுக்கொள்கிறான்.

பெலிசிட்டி, மக்லேன் கோஷ்டியின் இருப்பிடத்தை ஸ்பென்சரிற்கு காட்டித்தருகிறாள். ஸ்பென்ஸர் அமெரிக்க தலைமையகத்தை தொடர்பு கொண்டு இப்புதியதகவலை தெரிவிக்கிறான். இந்த தகவலை அறியும் ஜியோர்டினோ, ஜெனரல் விட்டேக்கரிடம் உடனடியாக காமாண்டோ குழுவொன்றை ரகசியமாக கொஸ்டா வெர்டிற்கு அனுப்பி வைத்து மக்லேன் கோஷ்டியின் கதையை முடிக்கச் சொல்கிறான். இதனை மறுத்து விடும் ஜெனரல் விட்டேக்கர் தான் ஜியோர்டினோவின் சதிகளில் இனி பங்கு கொள்ளப்போவதில்லை என்று தெரிவிக்கிறான்.

இதனால் சற்றும் அசந்து போகாத ஜியோர்டினோ சிஐஏயின் தலைவருடன் ஒர் புதிய திட்டத்தை உருவாக்குகிறான். சிஐஏயின் ரகசிய அதிரடி அணியொன்றை கொஸ்டா வெர்டிற்கு அனுப்பி வைத்து மாண்டோகிறிஸ்டோ அணையை சிதறடிக்க செய்வதே அத்திட்டம்.

வெடிப்பினால் உருவாகும் வெள்ளப் பேரழிவில் அணைக்கு அருகிலிருக்கும் பல கிராமங்கள் நீரில் மூழ்கும், வெள்ளத்தில் அகப்பட்டு மக்லேன் கோஷ்டியும் பரலோகம் செல்வார்கள், பேரழிவைத் தொடர்ந்து நாட்டில் ஏற்படும் பதட்ட நிலையைப் பயன்படுத்தி மரியாவின் ஆட்சியை வீழ்த்தி, அமெரிக்க கைப்பாவை அரசொன்றை கொஸ்டா வெர்ட்டில் நியமிக்கலாம் என்பன அத்திட்டத்தின் முக்கிய அம்சங்கள் ஆகும். அத்திட்டத்திற்கு ஜியோர்டினோ ஆப்பரேஷன் மாண்டோகிறிஸ்டோ எனப் பெயர் சூட்டி மகிழ்கிறான்.

பெலிசிட்டி தப்பி ஒடியதால் மாண்டோகிறிஸ்ரோ ஏரியில் மூழ்கி அங்கு அமிழ்ந்திருக்கும் ரகசியத்தினை தேடும் நடவடிக்கை துரிதப்படுத்தப்படுகிறது. மக்லேனும், மேஜர் ஜோன்ஸும் ஏரி நீரில் மூழ்குகிறார்கள். இதே ஏரியின் அடியில் மாண்டோகிறிஸ்ரோ அணையைத் தகர்ப்பதற்காக குண்டுகளை வைக்க சிஐஏயின் ரகசிய அதிரடிப்படை நபர்கள் ஏற்கனவே மூழ்கியிருப்பதை பாவம் அவர்கள் அறியமாட்டார்கள்….

XIII காமிக்ஸ் தொடரின் 16வது ஆல்பமான OPERATION MONTECRISTO விறுவிறுப்பிற்கு பஞ்சமில்லாத ஓர் கதை சொல்லலை தன்னகத்தே கொண்டிருக்கிறது. மக்லேன் கோஷ்டியை ஆயுததாரிகள் கடத்துவதிலிருந்து கதையின் முடிவு வரை, சில தருணங்களை தவிர்த்து தொய்வில்லாது தெளிவாகக் கதையை நகர்த்தியிருக்கிறார் வான் ஹாம். பெலிசிட்டி ஆயுததாரிகளிடமிருந்து தப்பிச் சென்ற பின்பாக கதையின் வேகம் அதிகரிக்கிறது. மக்லேனும், ஷோன் முல்வேயும் உணர்சி தெறிக்க உரையாடும் தருணங்கள் கதையின் வேகத்திற்கு தடை போடும் தருணங்களாக அமைந்து விடுகின்றன.

கடந்த ஆல்பங்களில் ஜியோர்டினோ சொல்வதெற்கெலாம் ஆமாம் சாமி போட்டுக் கொண்டிருந்த ஜெனரல் விட்டேக்கர், ஜியோர்டினோவின் கூட்டணியிலிருந்து பிரிந்து செல்வதை, XIII காமிக்ஸ் தொடரின் இரண்டாம் சுற்றின் முடிவை முன்னறிவிக்கும் திருப்பங்களில் ஒன்றாக எடுத்துக் கொள்ளலாம்.[நீரினடியிலிருக்கும் பிறிதொரு திருப்பத்தை கதையைப்படிக்கும்போது நீங்களே தெரிந்து கொள்வீர்கள்]

கதையின் இறுதிப்பக்கங்களில் மக்லேன் அணியினரிற்கு ஓர் இழப்பு ஏற்படுகிறது. வாசகர்களிற்கு உணர்ச்சிகரமான தருணத்தை தர விரும்பி வான் ஹாம் இதனை உருவாக்கியிருக்கலாம். ஆனால் இது தேவையற்ற ஓர் இழப்பு என்பதே என் தாழ்மையான கருத்து.

ஜெனரல் காரிங்டனின் பாத்திரம் கதையிலும், சித்திரத்திலும் சிறப்பாக வெளிவந்திருக்கிறது. காரிங்டனை வான்ஸ் மிக எடுப்பாக வரைந்திருக்கிறார். ஜனாதிபதி மரியா, மேஜர் ஜோன்ஸ் என எந்தப் பெண் வந்தாலும் கூச்சமில்லாமல் அணைத்துக் கொள்கிறார் மக்லேன். மக்லேனிற்கு ஜேசன் ஃப்ளை, கெலி பிரையன் போன்ற பெயர் வரிசைகளில் ஜெமினி கணேசன் எனும் பெயரையும் சூட்டி மகிழவே மனம் விரும்புகிறது. பெலிசிட்டி இந்த ஆல்பத்தின் கவர்ச்சி வினியோகத்திற்கு பொறுப்பேற்றிருக்கிறார். பெலிசிட்டிக்கு வயதுதான் கொஞ்சம் அதிகம் மிகுதியெல்லாம்……தாராளம். மக்லேன் எந்தப் பெண்ணிற்கு அருகில் சென்றாலும் மூஞ்சியை நீட்டும் மேஜர் ஜோன்ஸ், அழகு.

கொட்டும் மழையில் இடம்பெறும் கடத்தல் காட்சி, இயற்கை எழில் சூழ்ந்த மாண்டோகிறிஸ்டோ ஏரிக்காட்சிகள், நீரடிக் காட்சிகள் என வான்ஸ் கலக்கியிருக்கிறார். ஆனால் நீரடி மோதல் காட்சிகளில் பாத்திரங்களை சரியாக அடையாளப் படுத்திக் கொள்ள வாசகன் பக்கங்களை மீண்டும் மீண்டும் பார்த்து சிரமப்பட வேண்டியிருக்கிறது.

XIII காமிக்ஸ் தொடரின் 16வது ஆல்பம் அது வெளியாகுமுன்பே கடுமையாக விமர்சிக்கப்பட்ட ஒன்று, டார்கோட் தளத்தில் சில வருடங்களின் முன்பாக XIIIன் ஆல்பங்களிலேயே அதிகம் விற்பனையான ஆல்பம் என்று அறிவிக்கப்பட்ட ஒன்று. இவற்றைத் தாண்டி XIIIன் இரண்டாவது சுற்றில் தேறிய அரிதான ஆல்பங்களில் ஒன்று. [***]

எஞ்சியிருக்கும் இரு ஆல்பங்கள் குறித்தும் சுருக்கமாக கூறுவதே நல்லது என்று எண்ணுகிறேன். முடிவைத் தொட்டுவிட்ட தொடர் ஒன்றின் மர்மங்களை உடைக்காது இருப்பதே சாலச்சிறந்தது.

XIII.17- மக்ஸிமிலியனின் தங்கம்

கொஸ்டா வெர்ட்டில் அபாயங்களை முறியடிப்பதில் வெற்றி கண்ட மக்லேன் குழுவினர், ஏரியின் அடியில் கண்டெடுத்த ரகசியத்துடன் கொஸ்டா வெர்ட் நாட்டை நீங்கி மெக்ஸிக்கோவிற்கு செல்கின்றனர். பசுபிக் கரைகளின் அருகிலிருக்கும் ஒர் பகுதியில் ஜெனரல் காரிங்டனிற்கு வேண்டிய ஒருவனின் விடுதியில் ரகசியமாக மறைந்திருக்கின்றனர் மக்லேன் குழுவினர்.

தன்னுடன் இணைந்து செயற்பட மறுத்து விட்ட ஜெனரல் விட்டேக்கரை தீர்த்துக் கட்ட உத்தரவுடுகிறான் ஜியோர்டினோ. இக்கொலை முயற்சி ஏற்படுத்தும் விளைவுகள் ஜியோர்டினோவை மக்லேன் கோஷ்டியைத் தேடி மெக்ஸிக்கோ நோக்கி செல்ல வைக்கின்றன.

தாங்கள் ஏரியில் கண்டெடுத்த ரகசியத்தின் உதவியுடன் மக்லேன் குழுவானது மெக்ஸிக்கோவில் அவர்கள் தேடி வந்த பொருள் இருக்கும் இடத்தை அறிந்து கொள்கிறது. அப்பொருளைத் தேடி மெக்ஸிக்கோவின் ஆளரவமற்ற அபாயமான மலைப்பகுதிக்கு விரைகிறார்கள் அவர்கள். இவர்களை ரகசியமாகப் பின் தொடர்கிறது மெக்ஸிக்கோ கொள்ளைக் கோஷ்டி ஒன்று….

இந்த ஆல்பம் குறித்து பெரிதாகக் கூற எதுவுமில்லை. கதையில் எதிர்பாராதது ஆல்பத்தின் இறுதிப்பக்கத்தில் ரீ எண்ட்ரியாகும் ஒரு பெண்பாத்திரம். முன்னைய ஆல்பம் ஒன்றில் இப்பாத்திரம் மீது ரசிகர்கள் கொண்ட பிரியத்தை உடைக்கும் மீள்வருகையாக அது அமைந்து விடுகிறது. வான்ஸின் ஓவியங்களில் ஊசி மலைக்காட்சிகள் சிறப்பாக இருக்கிறது. காமிக்ஸ் தொடரின் இறுதி ஆல்பத்திற்கு முன்பான ஆல்பத்தில் கோட்டை விட்டிருக்கிறார் வான் ஹாம். வலுவற்ற கதை கொண்ட இந்த ஆல்பம் ரசிகர்களை ஏமாற்றவே செய்யும். [**]

XIII.19- இறுதிச் சுற்று

பத்திரிகையாளன் டேனி வெளியிடும் இரு புத்தகங்கள் அமெரிக்காவில் பெரும் பரபரப்பை ஏற்படுத்துகிறது. மெக்ஸிக்கோவில் மறைந்திருக்கும் மக்லேன் குழுவையும், அவர்களை முடித்து விடுவதற்காக அங்கு சென்றிருக்கும் ஜியோர்டினோவையும், விசாரணை ஒன்றின் முன்பாக நிறுத்துவதற்காக உடனடியாக அமெரிக்க மண்ணிற்கு எவ்வழியிலாவது கொண்டு வந்து சேர்க்க வேண்டிய பொறுப்பு ஒர் ஏஜெண்டிடம் ஒப்படைக்கப்படுகிறது. இப்பணியை நிறைவேற்ற மெக்ஸிக்கோ கிளம்பிச் செல்கிறார் அந்த ஏஜெண்ட்.

மெக்ஸிக்கோவில் இருக்கும் மக்லேன் குழுவை தீர்த்துக்கட்ட ஜியோர்டினோ, மெக்ஸிக்கோ மாபியா கும்பல் என்பன முழுவீச்சில் இறங்க, அமெரிக்காவில் நடக்கவிருக்கும் விசாரணையில் சில முக்கிய சாட்சிகள் பங்கு கொள்ளவே கூடாது என விரும்புகிறான் அதிகாரத்தின் உயர் மட்டத்திலிருக்கும் ஒர் நபர். தன் விருப்பத்தை நிறைவேற்ற அவன் கூலிக்கமர்த்திக் கொள்வது மேன்மைமிகு கொலைகாரி இரினாவை….

பல வருடங்களாக XIII காமிக்ஸ் தொடரின் ரசிகர்கள் ஏங்கிக் கிடந்த அதன் இறுதி ஆல்பம் முதல் பாதியில் பரபரப்பாக நகர்கிறது. திடீர் திருப்பங்களிற்கும், ஆக்‌ஷனிற்கும் குறைவேயில்லை. ஆல்பத்தின் பின்பாதி விசாரணைக் காட்சிகளில் தன்னை மூழ்கடிக்கிறது. ஆல்பத்தின் இறுதிப்பக்கத்தை படித்து முடிக்கும் போது “அட இவ்வளவுதானா” என்ற முனகல் வருவதைத் தவிர்க்க முடியாது.

தொடர் நெடுகிலும் முன்னைய ஆல்பங்களில் வாசகர்கள் அறிந்திருந்த தகவல்கள் மீண்டும் கூறப்படுகிறது. தமிழில் கதையை ஒரே தொகுப்பில் படிக்கப்போகும் வாசகர்களை இது சற்றுச் சலிப்படையவே வைக்கும். ஏஜெண்ட் XIIIன் அடையாளம் உறுதி செய்யப்படுகிறது இருப்பினும் அவனின் முன்னைய நினைவுகள் அவனிற்கு திரும்பவில்லை. ஆனால் கதையை வேறு ஓர் தளத்தில் தொடர்ந்து கொண்டு செல்வதற்குரிய சாத்தியத்தையும்! மர்மத்தையும்!! ஆல்பம் தன்னுள் கொண்டிருக்கிறது.

கதையின் நெகிழ்வான தருணம், கடற்கரையில் ஏஜெண்ட் XIIIஐ நினைவிழந்த நிலையில் காப்பாற்றிய தம்பதிகள் தங்கள் இறப்பின் பின்னும் கூட அவனிற்கு தரும் ஓர் அன்பு நிறைந்த, ஆச்சர்ய வடிவில் வருகிறது.

வான்ஸும், வான் ஹாமும் தங்கள் பணியை இயன்றளவு செய்திருந்தாலும் கூட XIIIன் ரசிகர்களின் எதிர்பார்ப்புக்களை இந்த ஆல்பம் முழுமையாக நிறைவு செய்து விடவில்லை என்பதே உண்மை. தமிழ் ரசிகர்கள் மனதில் தொடரின் முடிவு தரும் எதிர்வினைகளையும், XIII எனும் நாயகன் மேல் அவர்கள் கொண்டிருந்த அபிமானத்தின் உருமாற்றத் தெறிப்புகளையும் தமிழ் தொகுப்பின் வரவின் பின் ஆவலுடன் எதிர்பார்க்கிறேன். [***]

XIII காமிக்ஸ் தொடர் போன்று வாசகர்களை பரவலாகச் சென்றடைந்து வெற்றி பெற்ற காமிக்ஸ் தொடர்கள் காமிக்ஸ் வரலாற்றில் அதிகமில்லை. அதே போன்று காமிக்ஸ் சந்தையை XIIIக்கு முன், XIIIக்கு பின் எனவும் பிரித்துக் கொள்ளலாம்.

காமிக்ஸ் சந்தைக்கு அது கண்டிராத வகையில் விளம்பரப் பிரசார நுட்பங்களை அறிமுகம் செய்து வைத்த பெருமை XIII தொடரிற்கு உண்டு. அதன் படிப்படியான வளர்ச்சி இன்று Dan Brown நாவல்களின் விளம்பரங்கள், மற்றும் பிரபல சினிமா தயாரிப்புக்களிற்கு செய்யப்படும் விளம்பரங்கள் போன்று காமிக்ஸ் ஆல்பங்களிற்கும் விளம்பரங்கள், ட்ரெயிலர்கள் உருவாக்கப்படுகின்றன. வெகுஜன ஊடகங்களில் புதிய ஆல்பங்களின் வருகை, வெளியீடு போன்றவை குறித்த செய்திகள் வருவதற்கு தவறுவதே இல்லை.

சுருக்கமாக கூறினால் காமிக்ஸ் துறை நன்றாக இயங்குகிறது. பல்வேறுபட்ட காமிக்ஸ் பதிப்பகங்களிற்கிடையிலான போட்டியின் விளைவாக மிகச் சிறப்பான படைப்புக்கள் வாசகனை வந்தடைகின்றன. கிராபிக் நாவல்களின் தரமும், உள்ளடக்கமும் அசத்துகிறது. மங்கா வகை தனக்கென ஓர் தனியிடத்தையும் வாசகர் வட்டத்தையும் உருவாக்கி வெற்றி நடை போடுகிறது.

XIII காமிக்ஸ் தொடரின் வாசகர்களில் ஒருபகுதியினர் அவர்களிற்கு கிடைக்கக்கூடிய பலதரப்பட்ட காமிக்ஸ் பிரதிகளின் வாசிப்பின் மூலம் XIIIன் வாசிப்பனுபவத்தை கடந்து சென்று விடுகிறார்கள். புதிய படைப்புக்களின் வாசிப்பனுபவம் XIII தந்திருந்த வாசிப்பனுபவத்தை சில வேளைகளில் ஒரு படி கீழே இறக்கி விடுகிறது. இவ்வகை வாசகர்களிற்கு இப்போது XIII என்பது சிறந்த ஓர் வாசிப்பனுபவமோ அல்லது குறிப்பிடத்தக்க காமிக்ஸ் தொடரோ அல்ல.

ஆனால் XIIIக்கு இன்றும் வாசகர்கள் கிடைத்த வண்ணம் இருக்கிறார்கள். XIIIஐ புதிதாய் கண்ட வாசகனை அத்தொடர் தன்பால் கவர்ந்திழுக்கும் மந்திரத்தை தன்னுள் கொண்டதாகவே இருக்கிறது. தொடர் ஆரம்பித்து இருபத்தி ஐந்து வருடங்களாகியும் இன்றும் வெளிவரும் புதிய பதிப்புகள் XIII தொடரிற்கிருக்கும் கிராக்கியை தெளிவாக எடுத்துக் காட்டுகிறது. இது தொடரும்.

இனியும் XIII என்பதனை ஓர் அதிர்ஷ்டமில்லாத எண் என்று முழுமையாகக் கூறிவிட முடியுமா என்ன?!

ஒன்று, இரண்டு….XIII நிறைவடைந்தது.

நண்பர்கள் அனைவரிற்கும் என் இனிய பொங்கல் வாழ்த்துக்கள்.

முன்னைய XIII பதிவுகள்

ஒன்று, இரண்டு... XIII- ஒரு இருளின் ஒரு நாள் காதலன்

அடித்துக் கொட்டும் மழையினுடாக இருளை விரட்டியவாறே விரைந்து கொண்டிருக்கிறது ஓக்லாண்ட்- லாஸ் ஏஞ்சல்ஸ் நோக்கிச் செல்லும் ரயில் வண்டி. ரயிலில் சென்று கொண்டிருக்கும் மக்லேன், தென்னமெரிக்காவிலிருக்கும் சிறிய நாடொன்றில் தஞ்சம் கொண்டிருக்கும் தன் நலன் விரும்பிகளான ஜெனரல் காரிங்டன், மேஜர் ஜோன்ஸ் ஆகியோருடன் சென்றிணைந்து கொள்ள விரும்புகிறான்.

இதற்கு அவன் அமெரிக்க எல்லையைக் கடந்து மெக்ஸிகோவினுள் நுழைய வேண்டும். MOON VALLEY எனும் எல்லைப்புற சிறு நகரை அடைந்து, அங்கு ஜெனரல் காரிங்டனின் முன்னாள் சகா ஒருவனின் உதவியுடன், சிறு விமானமொன்றில் அங்கிருந்து தப்பிப்பதே மக்லேனின் திட்டம்.

ஆனால் மலைக்காட்டில் மக்லேனின் அதிரடித் தாக்குதலிலிருந்து உயிர் தப்பி விடும் அழகிய கொலைகாரி ஜெஸிக்கா, ஜியோர்டினோவைத் தொடர்பு கொள்கிறாள். மக்லேனை தீர்த்துக்கட்டுவதற்கு தனக்கு உதவியாக NSAன் கொலைஞர்களை அனுப்பி வைக்கும்படி கேட்டுக் கொள்கிறாள். மக்லேனிற்கு தெரியாது அவன் ஏறிய ரயிலில் அவளும் ஏறிவிடுகிறாள்.

SACRAMENTO ரயில் நிலையத்தில் நிற்கும் ரயிலில் ஜெஸிக்காவுடன் இணைந்து கொள்கிறர்கள் NSAன் மூன்று கொலைஞர்கள். ரயிலின் காவல் அதிகாரியை மிரட்டும் அவர்கள், மக்லேன் பயணம் செய்யும் பெட்டி எது என்பதனை அறிந்து கொண்டு அந்தப் பெட்டியை நோக்கி நகர ஆரம்பிக்கிறார்கள்.

NSAன் கொலைஞர்களின் வரவை அவதானித்துவிடும் மக்லேன் பெட்டியிலிருந்து நழுவி விடுகிறான். மக்லேன் பயணித்த பெட்டியின் கதவைத் திறக்கும் கொலைஞர்களிற்கு, திறந்திருக்கும் ஜன்னலும், வெறுமையான பெட்டியுமே கண்களில் படுகிறது. பதட்டமும், சினமும் அவர்களைப் பற்றிக் கொள்ள ரயில் முழுவதையும் சோதனை போட ஆரம்பிக்கிறார்கள் அந்தக் கொலைஞர்கள்.

தன்னைத் தேடும் கொலைஞர்களில் இருவரை மிகத்தந்திரமான வழிகளால் ஓடும் ரயிலிருந்து கீழே வீழ்த்தி விடுகிறான் மக்லேன். ஆனால் ரயில் கூரையின் மீது ஜெஸிக்காவின் துப்பாக்கி முனையில் அவன் மாட்டிக்கொள்கிறான். இறந்து விட்டதாக கருதியிருந்த ஜெஸியை மீண்டும் காண்பது அவனிற்கு வியப்பை அளிக்கிறது. அந்த வியப்புடன் அருகில் செல்லும் பிறிதொரு ரயிலின் கூரை மீது ஹீரோவிற்குரிய ஸ்டைலில் அசத்தலாகப் பாய்ந்து விடுகிறான் மக்லேன்.

மக்லேனை கண்டிப்பாக தீர்த்துக்கட்ட வேண்டிய நிர்பந்தத்திலிருக்கும் ஜெஸி, மக்லேன் பாய்ந்து தப்பிய ரயில் கூரை மீது தானும் பாய்கிறாள். பாயும் அவளின் பிடி, சளைக்காமல் பெய்யும் மழையில் வழுக்கி விட, ரயில் கூரையின் முனையைப் பற்றியவாறே கண்களில் புதிதாய்ப் பிறந்த பயத்துடன் தொங்கும் ஜெஸியின் உயிரைக் காப்பாற்றுகிறான் மக்லேன்.

ஓடும் ரயிலின் கூரையிலிருந்து பெட்டி ஒன்றுக்குள் ஜெஸியுடன் இறங்கும் மக்லேன், அபாயச் சங்கிலியை இழுத்து ரயிலை நிறுத்தி, முரண்டு பிடிக்கும் அழகி ஜெஸியுடன் தன் ஓட்டத்தை தொடர்கிறான்.

ரயில் பாதையின் அருகில் இவர்களிருவரையும் காணும் ஒர் குடும்பம் தங்கள் காரில் இவர்களையும் ஏற்றிச் சென்று அருகிலிருக்கும் WEST LAKE எனும் நகரில் இறக்கி விடுகிறது.

வெஸ்ட்லேக் நகரில் பறக்கும் பலூன் போட்டி அன்று நடக்கவிருப்பதை, தங்களை காரில் ஏற்றிக் கொண்டு வந்தவர்கள் மூலம் அறிந்திருந்த மக்லேன், போட்டி நிகழவிருக்கும் மைதானத்திற்கு ஜெஸியையும் அழைத்துச் செல்கிறான். மைதானத்தில் பறப்பதற்கு தயாராக நிற்கும் பலூன்களில் ஒன்றினுள் ஜெஸியை பலவந்தமாக தள்ளிப் போட்டுக் கொண்டு பலூனைப் பறக்க விடுகிறான் மக்லேன்.

தான் புதிதாக கற்றுக் கொண்ட பலூனில் பறக்கும் திறமையை தனக்குத்தானே மெச்சிக்கொள்கிறான் மக்லேன். ஆனால் திருடப்பட்ட பலூனை ஹெலியில் தேடி வரும் பொலிஸ் அவர்களை உடனடியாக தரையில் இறங்கும்படி கட்டளையிட வேறுவழியின்றி பலூனை தரையிறக்குகிறான் மக்லேன்.

தரையில் இறங்கியவர்களை விசாரிக்க ஆரம்பிக்கிறது பொலிஸ். ஜெஸிக்கா தன் NSA அடையாள அட்டையை அவர்களிடம் காண்பித்து NSAஐ உடனடியாக தொடர்பு கொள்ளச் சொல்கிறாள். மக்லேன் பொலிஸிடம் சிக்கினால் சிக்கல்கள் அதிகமாகும் என்பதை அவள் அறிவாள். NSAஐ தொடர்பு கொள்ளும் பொலிசாரிற்கு ஜெஸியின் அடையாளம் உறுதி செய்யப்படுவதுடன், ஜெஸிக்கு வேண்டிய உதவிகளை உடனே செய்து தரும்படியும் கட்டளை வழங்கப்படுகிறது.

மக்லேனின் விருப்பத்திற்கிணங்க அரிசோனாவின் எல்லையிலிருக்கும் யூமா எனும் நகரில் தங்களை கொண்டு சேர்க்கும்படி பொலிசாரைக் கேட்டுக்கொள்கிறாள் ஜெஸி. அவர்களிருவரையும் ஏற்றிக் கொண்டு யூமா நகர் நோக்கிப் பறக்க ஆரம்பிக்கிறது ஹெலி.

NSAஐ தொடர்பு கொண்ட பொலிசாரின் அழைப்பின் மூலம் மக்லேனும், ஜெஸியும் இருக்குமிடத்தை அறிந்து விடும் ஜியோர்டினோ, அவர்கள் அனைவரையும் தீர்த்துக் கட்ட ஒர் சிறு விமானத்தை அனுப்பி வைக்கிறான்.

மக்லேனையும் ஜெஸியையும் ஏற்றிச் செல்லும் ஹெலியை கண்டுபிடித்து விடும் அந்த ஆயுதம்தாங்கிய விமானம், அதனை நோக்கி சராமாரியாகச் சுட ஆரம்பிக்கிறது. காற்றைக் கிழித்துக் கொண்டு சீறி வரும் தோட்டாக்கள் ஹெலியின் உலோக உடலை பதம் பார்க்கின்றன. நடக்கப்போகும் விபரீதத்தை உணர்ந்து கொள்ளும் மக்லேன் ஜெஸியையும் இழுத்துக் கொண்டு கீழே நழுவிக் கொண்டிருக்கும் ஏரிக்குள் குதித்து விடுகிறான். அவர்கள் பயணம் செய்த ஹெலி அவர்கள் மேல் வெடித்துச் சிதறிப் போகிறது.

ஏரிக்குள் வீழ்ந்த மக்லேன் மயங்கிய நிலையிலிருக்கும் ஜெஸியை கரை சேர்க்கிறான். நினைவு திரும்பும் ஜெஸி, தான் கொல்லத்துடிக்கும் மக்லேன் தன் உயிரை இரு தடவைகள் காப்பாற்றியிருக்கிறான் எனும் எண்ணத்தால் சங்கடத்திற்குள்ளாகிறாள். மக்லேனை அவள் தன்னையறியாமலே நெருங்க ஆரம்பித்து விட்டதன் அந்தரங்கக் கணம் அது.

ஏரிக் கரையின் சூழலும், இரவும், நடந்த சம்பவத்தின் அதிர்ச்சியும், அவள் தன் மனதை மக்லேனிடம் திறந்து தன் தனிமை நிறைந்த வேதனையான கொலைகாரி வாழ்க்கை குறித்து கண்ணீருடன் பேச வைக்கிறது. மறுநாள் கார் ஒன்றை வாங்கும் ஜெஸி மக்லேனுடன் தன் பயணத்தை தொடர்கிறாள்.

நீண்ட பயணத்தில் ஓய்வெடுப்பதற்காக ஒர் விடுதியில் தங்குகிறார்கள் அவர்கள். அன்றிரவு தானே விரும்பி மக்லேனுடன் தன்னைக் கலக்கிறாள் ஜெஸி. தானே விரும்பி அன்பினால் உங்களைக் கலக்கும் பெண்களின் உள்ளத்தின் வாசம், உங்கள் மனதில் நித்யமானது. மரணத்தின் வாசலில் உங்கள் கண்களை ஈரமாக்குவது. உங்கள் மறுபிறப்புக்களையும் அழகாக்குவது.

மறுநாள் காலை மக்லேனை அவன் இலக்கான MOON VALLEYன் சிறு விமானதளத்திற்கு காரில் அழைத்துச் செல்கிறாள் ஜெஸி. தன்னுடன் வந்துவிடும்படி மக்லேன் விடுக்கும் அழைப்பை நிராகரித்து விடுகிறாள் அவள். காரை விட்டு இறங்கி விமானத் தளம் நோக்கி மெதுவாக நடக்க ஆரம்பிக்கிறான் மக்லேன். காரிற்குள் இருந்த கைத்துப்பாக்கியை பற்றுகிறது ஜெஸியின் அழகான கரங்கள், அவள் குறி மக்லேனின் முதுகின் மேல் பதிகிறது. ஆனால் மக்லேன் காதுகளில் வீழ்ந்ததெல்லாம் முரட்டுத்தனமாக பாதையை விட்டு விலகிச் செல்லும் ஜெஸியின் காரின் ஓசை மட்டுமே. அந்த ஓசையில் கலந்திருந்த ஒரு இருளின் அன்பிற்கான ஏக்கத்தை அப்போது அவன் உணர்ந்திருக்கவில்லை…. தனக்குப் பொறி வைத்துக் காத்திருக்கும் ஜியோர்டினோவின் கொலைஞர்கள் நிறைந்த அச்சிறு விமானத் தளத்தை நோக்கி அவன் கால்கள் நடந்து கொண்டேயிருந்தன..

XIII காமிக்ஸ் தொடரின் 15வது ஆல்பமான Lachez Les Chiensஐ [ நாய்களை ஏவுங்கள் ] வாசகர்கள் மூடும் போது அவர்கள் மனதில் தங்கி விடுவது ஒன்றே ஒன்றுதான். ஜெஸிக்காதான் அந்த அழகான ஒன்று.

பரபரப்பாக ஆரம்பிக்கும் ரயில் ஆக்‌ஷன் காட்சிகளில் அருமையான ஆக்‌ஷனை வழங்குகிறார்கள் வான்ஸ்- வான்ஹாம் கூட்டணி. மக்லேன், ஜெஸிக்காவை தன் பிடிக்குள் எடுத்துக் கொள்ளும்போது ஆரம்பத்தில் திமிறும் ஜெஸி பின்பு வரும் நிகழ்வுகளினால் தன்னை திறக்க ஆரம்பிக்கும் போது ஜெஸிக்காவின் பிடிக்குள் வாசகனை மாட்ட வைத்து விடுகிறது கதை. இந்த ஆல்பத்தில் வான் ஹாமின் வெற்றி என்பது அதுதான். அது மட்டும்தான்!!

கொடிய கொலைகாரியாக அவள் சித்தரிக்கப்பட்டாலும், தன் காரியங்களிற்காக கட்டில்களை அவள் பகிர்ந்திருந்தாலும், கதையின் ஒரு கட்டத்தில் ஒர் கணம் தான் அடிமைப்பட்டு விட்ட உண்மை அன்பிற்காக அவள் எடுக்கும் முடிவு அவளை மறக்க முடியாத பாத்திரமாக்கி விடுகிறது. அந்த முடிவின் வலியில் மக்லேனுடன் அவள் பகிர்ந்து கொள்ளும் வரிகள் வாசகனை உடைக்கும். அந்த வரிகளின் உணர்வுகளும், வலியும் கெடாது முழுமையாக ஓர் வாசகனைச் சென்றடையச் செய்வது கதையை மொழிபெயர்ப்பவர்களின் கடமை.

தன் பாணியில் சஸ்பென்ஸ் திருப்பங்களுடன் பின்பு வான்ஹாம் கதையை நகர்த்தினாலும் தொடரின் நீண்டகால வாசகர்களிற்கு சலிப்பின் சுவையை அறியச் செய்வதிலும் அவர் வெற்றி காண்கிறார். தொடரும் கதையின் சாத்தியமற்ற திருப்பங்கள் வாசகனை குழப்பத்தின் விளிம்பினை தொட்டுப் பார்க்க செய்கின்றன.

மக்லேனிற்கு உடம்பில் XIII எனும் பச்சை மட்டும்தானா இல்லை வேறு ஏதாவது முக்கியமான மச்சங்களும் உண்டா என்பதை வான்ஸ்தான் கூற வேண்டும். ஜெஸிக்கா, மரியா, ஜோன்ஸ் என்று மன்மத மக்லேன் ஆகிவிட்டார் சீரியஸான ஹீரோ. ஜேம்ஸ்பாண்டின் வைரஸ் தொற்றி விட்டது போலும்.

கதையை படிப்பவர்களில் பெரும்பாலானோர் ஆண்கள் என்பதை நன்கறிந்த ஓவியர் வான்ஸ், ஜெஸிக்காவின் முழு உடல் அழகையும் அவர்களிற்கு விருந்தாக்கியிருக்கிறார். குளியல் அறைக்காட்சி செம சூடு.

கதையின் ஒரு கட்டத்தில் தன் அடையாளம் குறித்த கேள்விகளை ஜெஸிக்காவிடம் மக்லேன் எழுப்புவார். அதற்கு ஜெஸிக்கா தரும் பதில்களையும், XIII காமிக்ஸ் தொடரின் 18வது ஆல்பமான La Version Irlandaiseல் நிகழும் சம்பவங்களையும் தமிழ் தொகுப்பு வெளிவரும் வேளையில் தயவு செய்து வாசகர்கள் ஒப்பிட்டுப்பார்க்கும்படி கேட்டுக் கொள்கிறேன். வாசகர்களை வாத்துக்கள் ஆக்குவதற்கு இதனைவிட சிறந்த உதாரணம் காட்ட முடியாது. ஜெஸிக்காவுடனான இத்தருணம் குறித்த தன் கோபத்தை மக்லேன், XIII காமிக்ஸ் தொடரின் 19வது ஆல்பத்தின் ஒரு பக்கத்தில் மேஜர் ஜோன்ஸிடம் விளக்குவார்.

சுருக்கமாகக் கூறினால், ஜெஸிக்கா எனும் பாத்திரம் காப்பாற்றிய ஆல்பம். [**]

XIII தொடரின் முன்னைய பதிவுகள்

அன்பு நண்பர்களே, கனவுகளின் காதலன் வலைப்பூவை ஆரம்பித்து இன்றுடன் ஒரு வருடகாலம் நிறைவடைகிறது. இந்த இனிய தருணத்தில் இவ்வலைப்பூவிற்கு தொடர்ந்து ஆதரவு வழங்கி வரும் நண்பர்கள் யாவரிற்கும் என மனதார்ந்த நன்றிகளை தெரிவிப்பது என் கடமையாகும். வருகை தந்து, கருத்துக்களைப் பதிந்து, உங்கள் பொன்னான ஓட்டுக்களை அள்ளி வழங்கி எனக்கு உற்சாகமும், ஊக்கமும் தந்து கொண்டிருக்கும் அனைத்து அன்புள்ளங்களிற்கும் என் அன்பான நன்றிகள்.

ஒன்று, இரண்டு...XIII- மலைக்காட்டின் மரணக்காற்று

அமெரிக்காவின் ஜனாதிபதியைக் கடத்தி வந்து தன் திட்டமொன்றை வெற்றிகரமாக நடாத்தவிருந்த ஜெனரல் காரிங்டனின் முயற்சியானது அவரே எதிர்பார்த்திராத சம்பவங்கள் சிலவற்றால் வேறு திசையில் நகர்ந்து விடுகிறது. அமெரிக்க மண்ணில் தொடர்ந்தும் இருக்க முடியாத இக்கட்டான நிலையில் ஜெனரல் காரிங்டன், மேஜர் ஜோன்ஸ், கேணல் ஏமஸ் ஆகியோர் கோஸ்டா வெர்ட்டிற்கு அருகிலிருக்கும் சிறிய நாடான SAN MIQUELக்கு தப்பிச் செல்கிறார்கள். அங்கு அவர்களை தன் இல்லத்தில் தங்க வைத்து தஞ்சம் தருகிறான் வாழைத் தோப்புக்களின் அதிபதியான ஆர்மண்ட் என்பவன்.

தனது நலன் விரும்பிகளுடன் தப்பிச்செல்ல மறுத்து விடும் மக்லேன் ஜியோர்டினோவினால் NSAன் ரகசியக் கட்டிடம் ஒன்றில் அடைத்து வைக்கப்படுகிறான். மக்லேனை மிக ரகசியமாக விசாரிப்பதற்காக அமெரிக்க நாட்டின் உயர் மட்ட அதிகாரிகள் குழு ஒன்று தயாராகிறது. தேசத்தின் நலன் கருதி இவ்விசாரணையானது ராஜாங்க ரகசியமாக பாதுகாக்கப்படுகிறது.

நியூயார்க் டெய்லியில் பயிற்சி பத்திரிகையாளானாக பணியாற்றுகிறான் இளைஞன் டேனி பின்கெல்ஸ்டீன். அதே பத்திரிகையில் பணியாற்றிய டேனியின் சகோதரனான ரொன்னும், ரொன்னின் சகாவான வரென் கிளாஸும் மூன்று ஆண்டு ஆய்வுகளின் பின்னணியில் மக்லேன் விவகாரம் குறித்த ஒர் துப்பறியும் அறிக்கையை* தயாரித்திருந்தார்கள்.[ * XIII MYSTERY, இக்காமிக்ஸ் தொடரின் 13வது ஆல்பம்]

ஆனால் மர்மமான முறையில் அந்த இரு பத்திரிகையாளர்களும் உயிரிழந்துவிட, அவர்கள் பாடுபட்டு தயாரித்த அறிக்கையும் எங்கென்று தெரியாமல் காணாமல் போய்விடுகிறது. தன் சகோதரனின் பணியை தொடரும் நோக்கில் NSAன் மறைவிடங்களை ரகசியமாகக் கண்காணித்து வருகிறான் டேனி. இதனைக் கண்டுபிடித்துவிடும் NSA அதிகாரிகள் தங்கள் அதிகாரத்தைப் பயன்படுத்தி டேனியை நியூயார்க் டெய்லிப் பத்திரிகையின் வேலையிலிருந்து தூக்கி எறிந்து விடுகிறார்கள்.

யாருமே உதவ வழியற்ற நிலையில் NSAன் மரணப்பிடியில் இருக்கும் மக்லேன் மீதான ரகசிய உயர்மட்ட விசாரணை ஆரம்பமாகிறது. விசாரணையில் மக்லேனிற்கு எதிராக சாட்சியங்களும், வாதங்களும் வலுப்பெறுகின்றன. இது நாள் வரையில் தான் சிறிது சிறிதாக சேகரித்து வந்த தன் அடையாளம் மெல்ல மெல்ல ஒர் கேள்விக்குறியாக தன்முன் நிலைபெறுவதை கண்டு குழம்பிப் போகிறான் மக்லேன். உண்மைகள் வேஷமாக உருமாறும் அதிசயம் அவனை உடைக்க ஆரம்பிக்கிறது.

விசாரணையை முன்னின்று நடாத்தும் ஜியோர்டினோ, மக்லேன் உண்மையான மக்லேன் அல்ல என்று வாதிடுகிறான். விசாரணையின் முடிவில் ஷோன் ஓ நீல் எனப்படும் அயர்லாந்து நாட்டைச் சேர்ந்த தீவிரவாதியாக நிரூபிக்கப்படும் மக்லேன், அமெரிக்க தேசத்திற்கு எதிராக அவன் இழைத்த பயங்கரவாதச் செயல்களிற்காகவும், அமெரிக்க நாட்டிற்கு அவன் ஒர் தொடர்ந்த அச்சுறுத்தல் என்றும் கருதப்பட்டு, அவன் வாழ்வின் எஞ்சிய நாட்கள் அனைத்தையும் மிகவும் தனிமைப்படுத்தப்பட்ட நிலையில் அரிசோனா சிறையில் கழிக்கவேண்டும் என்று தீர்ப்பு வழங்கப்படுகிறது.

மக்லேனிற்கு வழங்கப்பட்ட தண்டனையையடுத்து, ஆயுதம் தாங்கிய அதிகாரிகள் அவனை ஒர் காரில் அரிசோனா சிறைக்கு அழைத்து செல்கிறார்கள். அந்தக் காரை பின் தொடர ஆரம்பிக்கிறான் இளைஞன் டேனி. செல்லும் வழியில் டேனியின் கார் மக்கர் பண்ண, அவன் உதவிக்கு வந்து சேர்கிறாள் அழகான பெண் ஜெசிக்கா. ஜெசிக்காவின் காரில் மக்லேன் ஏற்றிச் செல்லப்படும் காரை மீண்டும் பின் தொடர ஆரம்பிக்கிறான் டேனி, தன்னருகில் அமர்ந்து வரும் ஆபத்தை உணராமலே.

மக்லேனை ஏற்றிச் செல்லும் வண்டி, செல்லும் வழியில் ஆளரவமற்ற ஒர் பகுதியில் நிறுத்தப்படுகிறது. மக்லேனை சிறைக்கு கொண்டு செல்லும் வழியிலேயே தீர்த்துக் கட்டி விடவேண்டுமென்பது ஜியோர்டினோவின் ரகசிய உத்தரவு. தப்பிச் செல்ல முயன்ற தீவிரவாதி சுட்டுக் கொலை என்று செய்தி வழங்குவது அவர்கள் திட்டம்.

காரிலிருந்து இறங்கிய மக்லேன், அவன் முன்னே சிரித்துக் கொண்டிருக்கும் மரணத்தை பார்த்துக் கொண்டிருக்கும் நிலையை தொலைவிலிருந்து தொலைநோக்கி மூலம் அவதானிக்கும் டேனி கொதிக்கிறான். அரச அதிகாரிகளின் உரிமைகள் பற்றிய அவன் கருத்தினைக் கேட்கும் ஜெசிக்கா அவனிற்கு பதில் அளிப்பதற்காக தன் துப்பாக்கியை டேனியை நோக்கி உயர்த்துகிறாள்.

துப்பாக்கி முனையில் இளைஞன் டேனியையும் மக்லேன் நிற்கும் இடத்திற்கு அழைத்து வருகிறாள் அழகி ஜெசிக்கா. தான் தொடர்ந்தும் NSA ஏஜெண்டுகளால் கண்காணிக்கப்பட்டு வந்திருப்பதை தாமதாக அறிந்து கொள்கிறான் டேனி. இந்த வேளையில் அவர்கள் நிற்கும் இடத்தை நோக்கி பறந்து வருகிறது ஓர் ஹெலிகாப்டர்.

அந்தரத்தில் நிலைகொள்ளும் ஹெலியிலிருப்பவர்கள் ஒலிபெருக்கி மூலமாக தாம் FBI சேர்ந்தவர்கள் என்று அறிவிக்கிறார்கள். கீழே நிற்பவர்களை தங்கள் ஆயுதங்களை கைவிடும்படி அறிவுறுத்துகிறது ஒலிபெருக்கி குரல். ஹெலியின் கீழ் நிற்கும் நபர்கள் ஆயுதங்களை தரையில் வீசுகிறார்கள். மக்லேனை சிறைக்கு எடுத்து செல்லும் அதிகாரிகளில் ஒருவர் நிலைமையை தெளிவுபடுத்த விரும்பி ஹெலியை நெருங்குகிறார்.

ஹெலியில் இருந்த காமாண்டோக்களின் இயந்திரத் துப்பாக்கிகளின் இசை அப்பகுதியை நனைக்கிறது. மக்லேனை அழைத்து சென்ற அதிகாரிகளில் இருவர் அந்த இசைக்கு இரையாகிவிட எஞ்சியிருந்த ஒருவனை ஜெசிக்கா தீர்த்துக் கட்டுகிறாள்.

நடப்பது என்ன என்று அறிய விழையும் மக்லேனின் முகத்தில் மயக்க மருந்து தெளிக்கப்படுகிறது. ஜெசிக்கா, டேனி, நினைவிழந்த மக்லேன் சகிதம் அந்திச் சூரியனை நோக்கி பறக்க ஆரம்பிக்கிறது அந்த ஹெலிகாப்டர்.

நடந்த சம்பவத்தின் தகவல் ஜியோர்டினோவிற்கு தெரிய வருகிறது. தேசத்தின் பாதுகாப்பைக் கருத்தில் கொண்டு மக்லேனைக் காணும் இடத்தில் அவன் கதையை முடித்துவிடும்படி தன் வேட்டை நாய்களிற்கு உத்தரவு வழங்குகிறான் ஜியோர்டினோ.

ஹெலியில் மயங்கிய நிலையில் பயணித்த மக்லேன் அவன் நினைவு திரும்பும் போது தான் ஒர் பனாமாக் கப்பலில் இருப்பதை அறிந்து கொள்கிறான். தன்னை அங்கு கடத்தி வரச் செய்த நபர் யார் என்பதை அவன் அறியும்போது அவன் ஆச்சர்யம் மேலும் அதிகரிக்கிறது. தன் வசீகரமான கொலைப் புன்னகையுடன் மக்லேனை தன் கப்பலிற்கு வரவேற்கிறாள் இரினா.

தான் ஆரம்பித்திருக்கும் ஓப்பந்தக் கொலைகாரர்களிற்கான சர்வதேச வலைப்பின்னல் அமைப்பொன்றைப் பற்றி மக்லேனிற்கு அழகாக விளக்குகிறாள் ஒப்பந்தக் கொலைகளை உலக மயமாக்கிய இரினா. மிகவும் தேர்ந்த கொலைகாரியான ஜெசிக்கா, NSAவிற்காக டயான் எனும் பெயரில் பணியாற்றி வந்தாலும் அவள் தனக்காகவும் ரகசியமாகக் காரியங்களை ஆற்றுபவள் என்பதை மக்லேனிற்கு அவள் தெரிவிக்கிறாள். வரவிருக்கும் விடியலில் மக்லேன் தன் இருப்பினை சில மணிநேரம் நீடிக்க விரும்பினால் அவனுடைய முழுச்சக்தியும் அவனிற்கு இன்றியமையாத ஒன்றாகவிருக்கும் என புதிர் போடுகிறாள் அவள்.

அலைகளின் ஈரத்துடன் விடியும் மறுநாள் காலையில் கப்பலின் மேற்தளத்திற்கு அழைத்து வரப்படுகிறான் மக்லேன். மக்லேனுடன் தான் ஆடப்போகும் மரண விளையாட்டைப் பற்றி அவனிற்கு விரிவாகக் கூற ஆரம்பிக்கிறாள் இரினா.

இரினாவின் சர்வதேச ஒப்பந்தக் கொலைகாரர் அமைப்பில் இணைந்து கொள்ள விரும்புகிறார்கள் மூன்று புதிய கொலைகாரர்கள். அவர்களை தன் அமைப்பில் இணைத்துக் கொள்ளுவதற்கு முன்பாக அவர்கள் மூவரின் திறமைகளையும் எடை போட விரும்புகிறாள் இரினா.

மக்லேன் சரியாக காலை ஆறு மணிக்கு ஒர் சிறிய மோட்டார் படகில் கலிபோர்னியாவின் கரைகளை நோக்கி தப்பலாம். அச்சிறிய படகில் எரிபொருள் கரையை அடைவதற்கான தூரத்திற்கு அளவாகவே நிரப்பப்பட்டிருக்கிறது. அப்படகில் ஒர் வெடிகுண்டு ரகசியமாக மறைத்து வைக்கப்பட்டிருக்கிறது. கரையை அடையும் தூரம் நெருங்கியதும் அவ்வெடிகுண்டு தானாகவே வெடித்து படகைச் சிதறடிக்கும். சரியாக மதியம் பனிரெண்டு மணிக்கு மூன்று புதிய கொலைகாரர்களும் மக்லேனை வேட்டையாடுவதற்காக கப்பலில் இருந்து ஒர் ஹெலிகாப்டரில் கிளம்புவார்கள்.

மக்லேனின் உயிரைக் கவர்வதற்கு அவர்களிற்கு அன்றிரவு ஒன்பது மணி வரை அவகாசம் வழங்கப்படும். ஆனால் அந்த நேர அவகாசத்தினுள் அவர்கள் மக்லேனின் இன்னுயிரை இழக்கச் செய்யாவிடில் அவர்கள் விட்ட இடத்திலிருந்து ஜெசிக்கா, மக்லேன் வேட்டையை தொடர்வாள். மக்லேன் ஒர் கில்லி என்பதை இரினா நன்கு அறிவாள் எனவே அவனின் வல்லமைக்கு ஒர் தடையாக இளைஞன் டேனியையும் சிறிய மோட்டார் படகில் அவனுடன் தப்பிச் செல்ல அனுப்பி வைக்கிறாள்.

டேனியனதும் மக்லேனினதும் கரங்கள் நீண்ட சங்கிலி ஒன்றில் இணைக்கப்பட்டிருக்கும் விலங்குகளில் மாட்டப்படுகிறது. தன் உயிரினைக் காப்பாற்ற வேண்டி கலிபோர்னியாவின் கரைகள் நோக்கி கடலோட ஆரம்பிக்கிறான் மக்லேன். தங்கள் கரங்களில் மாட்டப்பட்டிருக்கும் விலங்குகளினுள்ளே, அவர்கள் இருக்கும் இடத்தைக் காட்டித்தரும் ஒர் கருவி மிக ரகசியமாக தேர்ந்த கொலைகாரி ஜெசிக்காவினால் பொருத்தப்பட்டிருப்பதை அவன் அறிந்திருக்கவில்லை…..

XIII சம்பந்தமான கடந்த பதிவுகளில் நாங்கள் பார்த்த ஆல்பங்களில்[ 11, 12] மக்லேன் தன் கடந்த கால நிகழ்வுகளை அறிந்து கொள்வதற்காக பக்கங்களை தானம் செய்து விட்டு, கதைகளின் இறுதிக் கட்டத்தில் ஏதோ ஒர் மூன்று அல்லது நான்கு பக்கங்களில் அதிரடி ஆக்‌ஷனில் இறங்குவார். இவ்வாறு அதிரடி ஆக்‌ஷனில் இறங்கும் மக்லேன் எக்கச்சக்கமாக ஆபத்தில் மாட்டிக் கொண்டுவிட யாராவது வந்து கடைசி நேரத்தில் அவரைக் காப்பாற்றுவார்கள். அதிரடியில் இறங்கும் மக்லேனும் உயிர்களை அனாவசியமாக பறித்து விடக்கூடாது என்பதில் அக்கறை உள்ளவராகவே சித்தரிக்கப்பட்டிருப்பார்.

ஆனால் XIII காமிக்ஸ் தொடரின் 14வது ஆல்பமான Secret Defense மேற்கூறிய தன்மைகளிலிருந்து விடுபட்டு ஏறக்குறைய முழுமையான ஒர் திருப்பத்தை XIIIன் ரசிகர்களிற்கு வழங்குகிறது. 43 பக்கங்கள் கொண்ட இந்த ஆல்பத்தில் 15 பக்கங்கள் முற்று முழுதாக மக்லேனின் இடைவிடாத அதிரடி ஆக்‌ஷனிற்கு ஒதுக்கப்பட்டிருக்கின்றன. 1980களின் சர்வதேசக் காமாண்டோ ராம்போவே முக்காடு போட்டுக் கொள்ளும் அளவிற்கு ஆக்‌ஷன் திமிறிப் பாய்கிறது இந்தப் பக்கங்களில்.

மக்லேனிடமிருந்து நீண்டகாலமாக இவ்வகையான ஆக்‌ஷனிற்காக ஏங்கிக் கொண்டிருந்த ரசிகர்கள் ஆல்பத்தை கீழே வைத்து விட்டு விசிலடிக்கலாம், கைதட்டலாம், பல்டி அடிக்கலாம். மக்லேன் உங்களை ஏமாற்ற மாட்டார். இந்தப் 15 பக்கங்களினுள் மூன்று உயிர்களிற்கு அவர் மோட்சத்திற்கு அப்பால் டிக்கட் புக் பண்ணி விடுகிறார் என்பது குறிப்பிடத்தக்கது.

மீண்டும் தன் அடையாளம் குறித்த சந்தேகம் திரும்பி விட்ட நிலையில், மக்லேன் தன் உயிரைக் காப்பாற்றிக் கொள்வதற்காக ஓடும் ஓட்டம் பரபரப்பாக ஆல்பத்தில் கூறப்படுகிறது. ஆல்பத்தில் நெகிழ்வான தருணங்கள் என இரு தருணங்களைக் குறிப்பிடலாம். ஒன்று ஷோன் முல்வே வழங்கும் ஒர் சாட்சியம். இரண்டாவது மேஜர் ஜோன்ஸ், மக்லேனுடன் தொலைபேசியில் உரையாடும் கட்டம். மேஜர் ஜோன்ஸ் தன் மனதில் ரகசியமாக வைத்திருக்கும் மக்லேன் மீதான மென்மையான அந்தக் காதலை எந்தவித ஆர்பாட்டங்களுமின்றி அழகாக சொல்லி விடுகிறது ஓரே ஓர் சிறிய சித்திரக்கட்டம். அந்த சித்திரத்தில் மேஜர் ஜோன்ஸின் கண்களைப் பார்க்க மறக்காதீர்கள்.

ஆல்பத்தின் ஆரம்பத்தில் இடம்பெறும் மக்லேனின் எரிச்சல்தரும் விசாரணைக்காட்சிகள், முடிந்திருக்க வேண்டிய ஓர் தொடரை எவ்வாறு மேலும் சில ஆல்பங்களிற்கு வெற்றிகரமாக இழுத்தடிக்கலாம் என்று கதாசிரியர் வான் ஹாம் வாசகர்களிற்கு தரும் பாடமாக எடுத்துக் கொள்ளலாம். இருப்பினும் அவர் சஸ்பென்ஸ் திருப்பங்களுடன் அமைத்திருக்கும் இந்தக் கதை வேகமான ஒன்று என்பதில் ஐயமில்லை. கதையின் முடிவில் கூட ஒர் சஸ்பென்ஸை வைத்து அடுத்த ஆல்பத்தின் எதிர்பார்ப்பை கூட்டுகிறார் அவர்.

ஓரிகன் எல்லைக்கு அருகாமையில் அமைந்திருக்கும் மேற்கு கலிபோர்னியாவின் மலைக்காடுகளில் இடம்பெறும் ஆக்‌ஷன் காட்சிகளில் தன் திறமையைப் பின்னிப் பிழிந்தெடுக்கிறார் ஓவியர் வான்ஸ். குறிப்பாக மலைக் குன்றின் உச்சியிலிருந்து மக்லேன் குளிரான காட்டாற்றுக்குள் பாயும் காட்சியை விரிக்கும் சித்திரங்கள் அருமை. அழகி ஜெசிக்கா மற்றும் இரினாவின் அழகிய உடல்களையும் வாசகர்களின் கண்களிற்கு விருந்தாக்குகிறார் வான்ஸ்.

நல்ல கதை ஒன்றை தேடுவதை மறந்துவிட்டு, பரபர விறுவிறு ஆக்‌ஷனிற்காகப் படித்தால் இந்த ஆல்பத்தை ரசிகர்கள் நிச்சயம் ரசிக்கலாம். ஆனால் கதையைப் படிக்கும் போது உங்கள் விரல்கள் உங்களையறியாமலே உங்கள் காதுகளை தடவிப் பார்க்க முயன்றால் அது இயல்பான ஒன்று என்பதையும் புரிந்து கொள்ளுங்கள். [***]

அன்பு நண்பர் ரஃபிக்கிற்கு எங்கள் இனிய பிறந்தநாள் வாழ்த்துக்கள்.