நூறு தோட்டாக்கள்

சோப்பு போட்டுக் கழுவினாலும் மனதை விட்டு நீங்காத சிறையின் நாற்றம். பதினைந்து வருடச் சிறை. சிறைத் தண்டனையை முடித்தும் Dizzyயின் மனதில் விடுபடாமலிருக்கும் அந்தக் குற்றவுணர்ச்சி. தன் அன்பு மகன் ஹெக்டரும், காதல் கணவன் சாண்டியாகோவும் படுகொலை செய்யப்பட தானே முழுக் காரணம் எனும் எண்ணம் அவள் மனதைக் கூரான சிறு கத்திபோல் குத்திக் கொண்டிருந்தது.

சிறையிலிருந்து விடுதலை. வீடு நோக்கிய பயணம். சிந்தனைகளின் சுழல்களில் சிக்கி உழலும் மனம். ரயில் வேகமாக ஓடிக் கொண்டிருக்கிறது. அப்போதுதான் அந்த நபர் டிஸ்ஸியை நோக்கி வந்தார். அவள் அருகில் அமர்ந்தார்.

ஏஜண்ட் கிரேவ்ஸ் என்று தன்னை டிஸ்ஸியிடம் அறிமுகம் செய்து கொள்ளும் அந்த நபரிற்கு டிஸ்ஸியின் வாழ்க்கை குறித்து அத்துப்படியாக தெரிந்திருக்கிறது. அவள் வாழ்க்கை ரோஜா இதழ்களால் நெய்யப்பட்டிருக்கவில்லை. டிஸ்ஸி, சிறு வயதிலேயே குற்றச் செயல்களிற்கு அறிமுகமானவள். சீர்திருத்தப் பள்ளிகளில் தன் நாட்களைக் கழித்தவள்.

பின்பு சாண்டியாகோவுடன் காதல். திருமணம். அன்புக் குழந்தை ஹெக்டர். புதிய வாழ்க்கை. திடீரென ஒரு நாள் தெருவில் இடம்பெறும் ஒர் துப்பாக்கி மோதல். மோதலில் உயிர்பிழைத்த டிஸ்ஸி குற்றவாளியாகச் சிறையில். கணவனும், மகனும் இனந்தெரியாத நபர்களால் தெருவில் வைத்து சுடப்பட்டு படுகொலை. தன்னை வஞ்சம் தீர்ப்பதற்காகவே தனக்கு எதிரான ரவுடிக் குழுவொன்றால் இக்கொலைகள் நிகழ்த்தப்பட்டிருக்க வேண்டும் எனக் கருதும் டிஸ்ஸி.

ஆனால் ஏஜண்ட் கிரேவ்ஸ், டிஸ்ஸியின் மகனையும், கணவனையும் கொன்றது இரு பொலிஸ் அதிகாரிகள் என்பதை அவளிற்கு தெரிவிக்கிறார். அந்த அதிகாரிகளின் போட்டோவொன்றையும் கிரேவ்ஸ் டிஸ்ஸிற்கு வழங்குகிறார். கூடவே ஒரு சூட்கேஸையும் அவளிடம் தருகிறார்.

அந்த சூட்கேஸினுள் அடையாளம் காண முடியாத நூறு தோட்டாக்களும், ஒரு கைத்துப்பாக்கியும் இருக்கின்றன. கொலைகாரர்களான இரு பொலிஸ் அதிகாரிகள் குறித்து டிஸ்ஸி செய்ய விரும்பியதை செய்வதற்கு க்ரீன் சிக்னல் வழங்குகிறார் ஏஜென்ட் கிரேவ்ஸ். எந்த விசாரணைகளிலிருந்தும் அவளைத் தான் காப்பாற்றுவேன் என்பதனையும் கிரேவ்ஸ் அவளிற்கு தெரிவிக்கிறார்.

டிஸ்ஸியின் முடிவு இரு பொலிஸ் அதிகாரிகளையும் தீர்த்துக் கட்டுவது எனில், அது குறித்த பொலிஸ் விசாரணைகள் மரணத்திற்கு காரணமான தோட்டாக்களை கண்டெடுப்பதுடன் நின்றுவிடும் என்பதையும் கூறிவிட்டு டிஸ்ஸியை விட்டு விலகிச் செல்கிறார் கிரேவ்ஸ்….

டிஸ்ஸி எடுத்த முடிவு என்ன? தன் கணவன் மற்றும் மகன் இருவரினதும் படுகொலைகளிற்கு பின் ஒளிந்திருக்கும் ரகசியத்தை அவள் கண்டு பிடித்தாளா? வஞ்சத்தின் சுவையை டிஸ்ஸி அறிந்து கொண்டாளா?

=========

வழமையான மதுபான விடுதிக் கைகலப்பு. உடைந்து சிதறிய கண்ணாடித் துண்டுகளைக் கூட்டி அள்ளுகிறான் லீ. உடைந்துபோன அவன் வாழ்க்கையைத்தான் அவனால் அள்ளிவிட முடியவில்லை.

அழகான மனைவி. புத்திசாலிக் குழந்தைகள். இனிய குடும்ப வாழ்க்கை. லீ, பிரபல உணவகம் ஒன்றின் உரிமையாளன். பின் ஒரு நாள் லீயின் வீட்டினுள் நுழையும் FBI ஏஜண்டுகள். லீயின் கணணியில் அவனிற்கு தெரியாமலே வந்து குந்தியிருக்கும் சிறுவர் பாலியல் துஷ்பிரயோக [Pedophile] போட்டோக்கள்.

லீயின் பெயரும் பீடோபைல்களின் பட்டியலில் இடம் பிடிக்கிறது. ஊடகங்கள் அவனைச் சிலுவையில் அறைகின்றன. அவன் மனைவியும் குழந்தைகளும் அவனை விட்டுப் பிரிந்து செல்கிறார்கள். லீயின் உணவகம் வாடிக்கையாளர்களை இழந்து, நஷ்டத்தில் மூடப்படுகிறது.

இப்போது, அழுக்கு வடிந்தொழுகும் இந்த மதுபான விடுதியில் லீ ஒரு ஊழியன். தன் வாழ்க்கையை யாரோ சதி செய்து உடைத்தார்கள் என்று உறுதியாக நம்புகிறான் லீ. கையாலாகதவனாக.

குடிகாரர்கள், விபச்சாரிகள், வாழ்வைத் தொலைத்தவர்கள். அழுக்கான பார். மேலும் அழுக்கேற முடியாத வாழ்க்கை. அந்த பாரில்தான் லீயை வந்து சந்திக்கிறான் ஏஜண்ட் கிரேவ்ஸ். லீயின் கணிணியில் பீடோபைல் போட்டோக்களை பதுக்கியது யார் என்பதை லீக்கு அறியத்தருகிறான் கிரேவ்ஸ்.

அவள் ஒரு அழகிய இளம் பெண். அவள் பெயர் மெகான். வழமை போலவே அடையாளம் காண முடியாத நூறு தோட்டாக்களையும், ஒரு கைத்துப்பாக்கியையும் கொண்ட ஒரு சூட்கேஸை லீயிடம் விட்டுச் செல்கிறான் கிரேவ்ஸ். தன் வாழ்வை நொருக்கியவளை பழி வாங்குவது இனி லீயின் கைகளில்…

யார் இந்த மெகான்? ஏன் மெகான் அந்த போட்டோக்களை லீயின் கணிணிக்கு அனுப்பி வைத்தாள்? மெகானை லீ பழிவாங்கினானா?

அடையாளமில்லாத நூறு தோட்டாக்கள் மனிதர்களின் வாழ்வில் கொண்டு வரும் அதிரடிச் சம்பவங்களை வாசகன் கண்முன் விரிக்கும் மேற்கூறியவை போன்ற கதைகள்தான் 100 Bullets காமிக்ஸ் தொடரின் உயிர்நாடி. தன் மனதில் இருக்கும் வஞ்சத்தை தீர்க்க மனிதர்களிற்கு தரப்படும் ஒரு வாய்ப்பு. அந்த வஞ்சத்தை தேடிய அவர்களின் பயணத்தில் வெளிக்கிளம்பும் எதிர்பாராத ரகசியங்கள். அவர்கள் தங்கள் வஞ்சத்தைத் தீர்த்தார்களா இல்லை அந்த வஞ்சம் அவர்களை வேறு சுழல்களிற்குள் இட்டுச் சென்றதா என்பதை அருமையான கதை சொல்லலுடனும், கதைகளின் இருளை உணர்த்திடும் அசர வைக்கும் சித்திரங்களுடனும் வாசகனிடம் எடுத்து வருகிறது 100 Bullets.

டிஸ்ஸியின் கதையை எடுத்துக் கொண்டால், அவள் வாழும் இடத்தின் சூழலையே உயிர் ததும்ப கதாசிரியர் Brian Azzarello கதைக்குள் புகுத்தி விடுகிறார். வசதியற்ற மெக்ஸிகன் வம்சாவழி மக்கள் அடர்ந்து வாழும் அந்தப் பகுதியில் நிலவும் வறுமை, வெறுமை, குற்றக் குழுக்கள், அவற்றிற்கிடையேயான மோதல்கள், போதைப் பொருள், கொலைகள், காவல்துறையின் தகிடுதித்தங்கள், தங்கள் துணைகள் சிறையில் வாழ்ந்திருக்க வெளி உலகில் வாழத் தவிக்கும் இளம் அன்னைகள் என அச்சூழல் குறித்த ஒரு நிறைவான பார்வையை மூன்று பாகக் கதையில் வழங்குகிறார் கதாசிரியர்.

லீயின் கதை மதுபான விடுதியையும், அதனை நாடி வருபவர்களையும் பிரதானமாகக் காட்டி இரு பாகங்களில் கதையை நகர்த்துகிறது. ஆடை அவிழ்ப்பு நடன பார்களில் லீ காணும் நடனங்கள் மட்டுமே அவனை மனிதனாக உணர வைக்கும் தருணங்கள் என்பதாக சித்தரிக்கப்பட்டிருக்கிறது. உச்ச செல்வந்த அதிகாரத்தையும்,அறிவையும், உடைந்து போன மனிதன் ஒருவனின் வஞ்சத்தையும் மோதவிட்டிருக்கிறார் கதாசிரியர். இக்கதையின் முடிவு மனதை நெகிழ வைக்கும்.

கதைகளில் வரும் பிரதான பாத்திரங்களின் வலிகள், பலவீனங்கள், நம்பிக்கைகள், வாழ்க்கை குறித்த அவர்களின் கேள்விகள் என்பவற்றின் துணையுடனேயே கதையை நகர்த்துகிறார் பிரையன் அஸாரெல்லோ. அப்பாத்திரங்களிற்கு அவர் மிகையான சக்திகளையோ, வாய்ப்புக்களையோ வழங்கவில்லை. நாளாந்த வாழ்வின் நிகழ்வுகளோடும், உணர்வுகளோடும் சாதாரண மனிதர்கள்போல் மோதுகிறார்கள் அவர் உருவாக்கியிருக்கும் பாத்திரங்கள். கதையில் வஞ்சம் என்பதன் வெற்றி, வஞ்சம் தீர்க்க விழையும் பாத்திரங்களின் வாழ்க்கை ஓட்டத்தால் தீர்மானிக்கப்படுகிறது. இதுதான் இக்காமிக்ஸ் தொடரின் மிகவும் கவர்சியான அம்சமாகும்.

கதை நடக்கும் சூழலிற்கேற்ப மொழியையும் சிறப்பாக கையாள்கிறார் கதாசிரியர். சில உரையாடல்களில் கத்தியின் கூர்மை மின்னுகிறது. உரையாடல்கள், படிப்பவர்களைக் கதையின் சூட்டோடு ஒன்றச் செய்வதில் வெற்றி காண்கின்றன. ஒரு Noir வகைத் த்ரில்லரிற்குறிய அம்சங்களை அளவுடன் உள்ளடக்கி கதைகள் சிறப்பான வகையில் வடிவம் பெற்றிருக்கின்றன.

கதைகளின் இருளையும், சூட்டையும், சூழலையும், கவர்ச்சியையும் கண்முன் நிறுத்துகின்றன ஓவியக் கலைஞர் Eduardo Risso வின் சித்திரங்கள். மிகவும் நளினமான பாணியில் அமைந்திருக்கும் அவர் சித்திரங்கள் காமிக்ஸ் தொடரின் கூடுதல் பலம். வாசகர்களிற்கு கொண்டு செல்ல வேண்டிய உணர்ச்சிகளை அவர்களிடம் அழகாக எடுத்து வருகிறது ரிஸோவின் சித்திரங்கள். நிழலும், ஒளியும் கலந்த அவர் சித்திரங்கள், கதை நகரும் சூழலோடு அதனைப் படிப்பவர்களை இலகுவாக ஒன்ற வைக்கிறது. ரிஸோ வழங்கியிருக்கும் ஆக்‌ஷன் தருணச் சித்திரங்கள் அதிர்கின்றன. தனக்கென தனிப் பாணி கொண்ட காமிக்ஸ் ஓவியர்களில் ரிஸோ குறிப்பிடத்தக்க ஒருவர்.

கதைத் தொடரின் மிக முக்கிய கேள்வி, யார் இந்த ஏஜண்ட் கிரேவ்ஸ் என்பதாகும். கிரேவ்ஸ் ஏன் மனிதர்களிற்கு வஞ்சம் தீர்ப்பதற்குரிய வாய்ப்பை வழங்குகிறார்? அம்மனிதர்கள் குறித்து அவர் எவ்விதம் அறிந்து கொண்டார்? இதன் மூலம் கிரேவ்ஸ் அடைய விரும்புவது என்ன? மொத்தம் 13 தொகுப்புக்களாக வெளிவந்திருக்கும் 100 Bullets காமிக்ஸ் தொடர் இக்கேள்விகளிற்கான விடைகளை வழங்கும். 100 Bullets கதை நெற்றியில் துப்பாக்கி ஒன்று அழுத்தும் உணர்வின் ஒரு அலையை வாசகனிடம் இலகுவாகக் கடத்திவிடுகிறது. படிக்க ஆரம்பித்தால் ஆல்பத்தை முடித்து விட்டுத்தான் அடுத்த வேலை பார்க்க வைக்கும் காமிக்ஸ் கதைகளில் 100 Bullets சுலபமாக இணைந்து கொள்கிறது. [****]

முதல்பாகத்தினை தரவிறக்க