மந்திரா, மந்திரா

ஆதியில் உலகை சிருஷ்டித்தவனிற்கும், அவனுடைய தூதர்களில் ஒருவனான லுசிபரிற்கும் ஏற்பட்ட கருத்து வேறுபாட்டினால் லுசிபர் பாதாளம் நோக்கித் தள்ளப்பட்டான். பாதாளம் நோக்கிய அவன் வீழ்ச்சியின் போது அவன் நெற்றியிலிருந்த மரகதக் கல் ஒன்று பூமியில் வந்து வீழ்ந்தது.

உலகைச் சிருஷ்டித்தவனின் விசுவாசிகளான ஞானிகள் ஏழு பேர், பூமியில் வீழ்ந்த மரகதக்கல்லை தேடி ஒர் பயணத்தை ஆரம்பித்தனர். மரகதக் கல்லிலிருந்து கிளம்பிய ஒர் மர்ம ஒளிவீச்சின் வழியாக அம்மரகதக்கல்லை கண்டுபிடித்து விடும் ஞானிகள், அக்கல்லினுள் புதைந்திருக்கும் ரகசியத்தை அறிந்து கொள்கின்றனர்.

தாம் தெரிந்து கொண்ட விடயங்களை உலக மக்களிற்கு அறிவிப்பதற்காக ஆறு ஞானிகள் கிளம்பிச் செல்ல, எஞ்சிய ஞானி மரகதக்கல்லினை பாதுகாப்பாக தன்னுடன் வைத்திருக்கிறான். சில காலங்களின் பின் மரகதக்கல்லுடன் ஜெருசலேம் நகரை அடைகிறான் அந்த ஞானி.

ஜெருசலேம் நகரை அடைந்து பல நூறு வருடங்களின் பின் அம்மரகதக் கல்லானது சீமோன் என்பவரின் கைகளினால் உருவாக்கப்பட்ட ஒர் கிண்ணத்தில் இடம்பிடித்துக் கொள்கிறது. இயேசுவின் இறுதி ராப்போசனத்தின் போது அவர் கரங்களில் ஏறிய கிண்ணம் இதுவே.

இயேசுவின் மரணத்தின் பின் அவரது உடலை அரிமத்தியா சூசை என்பவர் ஒர் கல்லறையில் அடக்கம் செய்தார். தன் இறப்பின் மூன்றாம் நாளின் பின் இயேசு உயிர்த்தெழுந்து விட, கல்லறையிலிருந்து இயேசுவின் உடல் மறைந்ததற்கு அரிமத்தியா சூசையைக் காரணமாக்கி அவரை ஜன்னல்கள் இல்லாத ஒர் இருண்ட கோபுரத்தில் அடைக்கின்றனர் அதிகாரிகள்.

இருண்ட கோபுரத்தின் நிரந்தர இருளில் சிந்தனையில் ஆழ்ந்திருக்கும் அரிமத்தியா சூசைக்கு காட்சி தரும் இயேசு, மரகதக் கிண்ணத்தை அவரிடம் தருகிறார். அக்கிண்ணம் பல சக்திகளை தன்னுள் கொண்டிருக்கிறது என்பதையும் அவர் தெரிவிக்கிறார். அக்கிண்ணத்திற்கு GRAIL எனும் பெயரையும் அளிக்கிறார்.

தண்டனை முடிந்து விடுவிக்கப்படும் அரிமத்தியா சூசை, நகரை விட்டு நீங்கி கடல் வழியாக மேற்கு நோக்கி தன் பயணத்தை ஆரம்பிக்கிறார். அவர் பயணத்தின் நோக்கம் அவலோன் எனும் தீவைக் கண்டு கொள்வதாக இருக்கிறது.

சில நூற்றாண்டுகளிற்கு பின்

ஒரே ஒர் உண்மையான கடவுள் எனும் நம்பிக்கையின் வரவு தங்கள் பிரதேசத்தை நெருக்குவதை அறியும் செல்டிக் பெண் தேவதையான ஏஸ், தங்களைப் போன்ற தேவர்களின் இறுதிக்காலம் நெருங்குவதை உணர்கிறாள். தங்கள் தெய்வங்கள் நிரந்தரமாக மக்களால் மறக்கப்படப் போவதை எண்ணிக் கலங்கும் அவள், அதனை தடுப்பதற்காக ஒரு மானுடப் பெண்ணையும், தேவன் ஒருவனையும் உறவு கொள்ள வைத்து ஒர் புதிய உயிரை உருவாக்குவது என்று முடிவெடுக்கிறாள்.

காற்றுத் தேவனை தன் சக்தியால் வரவழைக்கும் ஏஸ், அவனிடம் தன் விருப்பத்தை தெரிவிக்கிறாள். ஏஸ் கூறியபடியே தூய்மையான ஒர் பெண்ணை தேடி பிரெத்தான் பிரதேசம் எல்லாம் அலையும் காற்றுத் தேவன் இறுதியில் ஒர் சிறுகிராமத்தில் அவளைக் கண்டு கொள்கிறான்.

அப்பெண்ணின் பெயர் மயேல். அவள் உறங்கும் போது அவள் சொப்பனத்தில் கலந்து, அவளுடன் காதல் உறவாடி அவள் வயிற்றில் ஒர் உயிரைக் கருவாக்குகிறான் காற்றுத்தேவன். உறக்கம் விழிக்கும் மயேல் தன் உடலில் ஏற்பட்டிருக்கும் மாற்றங்களினால் அச்சம் கொண்டு தன் கிராம ஆலயத்தின் குருவானவரான பிலேய்ஸிடம் தன் சந்தேகங்களை கூறி பரிகாரம் கேட்கிறாள். அவளிற்கு ஆறுதல் கூறுகிறான் ஆலயக் குரு பிலேய்ஸ். ஆனால் அவன் மனதிலோ புதிய வரலாறு ஒன்று ஆரம்பம் ஆகிறது எனும் குரல் மெளனமாக ஒலிக்கிறது.

நாட்கள் செல்ல செல்ல மயேலின் உடலில் ஏற்படும் மாற்றம் கிராம மக்களால் அவதானிக்கப்படுகிறது. அவள் நடத்தையைப் பற்றி வாய்க்கு வந்த படி பேசுகிறார்கள் கிராம மக்கள். மயேலின் சகோதரியும் அவளிற்கு தொல்லை தருகிறாள். ஒர் நாள் வீதியொன்றில் வைத்து ஊர் மக்களின் முன்பாக மயேலை அவமானப்படுத்துகிறாள் அவள் சகோதரி. மயேலின் துணிகளைக் களைந்து அவள் கர்ப்பமாகவிருக்கிறாள் என்பதை ஊரின் கண்களிற்கு காட்டுகிறாள் அவள்.

மயேல் உயிருடன் இருக்கக் கூடாது எனக் கூறியவாறே அவள் மேல் கொலை வெறியுடன் பாய்கிறாள் மயேலின் சகோதரி. பிறக்கவிருக்கும் குழந்தைக்கு வரவுள்ள ஆபத்தை கண்டுகொள்ளும் தேவதை ஏஸ் தன் மந்திர சக்தியால் மயேலின் சகோதரியை கொன்றுவிடுகிறாள். இந்நிகழவைப் பார்த்த கிராம மக்கள் மயேலை சூனியக்காரி என்று திட்டுகிறார்கள். பிலேய்ஸ் கிராம மக்களுடன் வாதிட்டு மயேலைப் பாதுகாப்பாக தன்னுடன் அழைத்து செல்கிறான்.

ஆத்திரம் அடங்காத கிராம மக்கள் மயேலின் குடிசைக்கு தீ வைக்கிறார்கள். ஆனால் மயேலை அழைத்துக் கொண்டு பிலேய்ஸ் படகில் ஏறி கிராமத்திலிருந்து தப்பிவிடுகிறான். கிராம மக்களின் மீது கோபம் கொள்ளும் ஏஸ், கடல் தேவனை அழைத்து மயேலின் கிராமத்தை அவன் அலைகளால் மூழ்கடிக்க சொல்லி கட்டளையிட, ராட்சத அலைகள் கிராமத்தை மூழ்கடித்து அழிக்கின்றன.

கடலில் படகில் பயணித்துக் கொண்டிருக்கும் மயேலிற்கு பிரசவ வலி எடுக்கிறது. அந்தப் படகிலேயே அவள் ஒர் ஆண் குழந்தையைப் பெற்றெடுக்கிறாள். அந்தக் குழந்தைக்கு மெர்லின் எனப் பெயரும் சூட்டுகிறாள்…..

இயற்கையுடன் மனிதன் சேர்ந்து வாழ்ந்த காலங்களில் அவன் விருட்சங்களுடனும், விலங்குகளுடனும் பரிபாஷனை செய்யக் கூடியவனாக இருந்திருக்கிறான். இத்தகைய சக்திகள் கொண்ட சித்தர்கள் இயற்கையை தெய்வங்களாக கண்டனர். இயற்கையுடன் சார்புடைய கடவுள்கள் பலர் மக்களால் கொண்டாடப்பட்டிருக்கிறார்கள்.

ஒரே ஒரு உண்மையான கடவுள் எனும் புதிய நம்பிக்கையின் வேகமான பரவல் மனிதர்களிற்கும் இயற்கைக்குமிடையிலான உறவை மூட நம்பிக்கை, போலித் தெய்வ வழிபாடு என்று உரக்க உரைத்து நசுக்க ஆரம்பித்தது.

இயற்கையுடன் தொடர்புடைய புராண தெய்வங்களின் அழிவைத் தடுப்பதற்காக அவர்களினால் உருவாக்கப்பட்டவனே மெர்லின் என்பவன் என்ற கருவைக் கொண்டதாக இக்காமிக்ஸ் தொடர் ஆரம்பமாகிறது.

புராதன பிரித்தானியைச் சேர்ந்த [இங்கிலாந்து, வேல்ஸ், ஸ்காட்லாந்தின் தென்பகுதியை உள்ளடக்கிய வலயம்] புகழ் பெற்ற ஞானியும், மாந்தீரிகனுமான மெர்லினின் பிறப்பு, குரு பிலேய்ஸ் மூலமாக சிறு வயதில் அவன் கற்றுக் கொள்ளும் பாடங்கள், மெர்லினில் புதைந்துள்ள மகத்தான சக்திகளின் வெளிப்பாடு என்பவற்றுடன் MERLIN எனும் காமிக்ஸ் தொடரின் முதல் ஆல்பமான La Colére d’Ahés [ஏஸின் சினம்] நிறைவு பெறுகிறது. தொடரும் ஆல்பங்கள் மெர்லினின் கதையை விறுவிறுப்பாக கூறுகின்றன [மெர்லினை தன் சக்திக்குள் இழுக்கும் GRAIL கிண்ணம்,பிலேஸுடனான பிரிவு, ஏஸின் சதி, மெர்லினின் மாய உலகப் பயணம், மனிதர்களிற்கு எதிராக மெர்லின் தொடுக்கும் போர்…..]

மெர்லின், மன்னன் ஆர்தரின் கதைகளில் இடம்பெற்ற ஒர் புகழ் பெற்ற மந்திரவாதி ஆவார். ஆர்தரை மன்னனாக்கி அவரிற்கு ஆலோசகராகவும் செயற்பட்டு வந்தவர் எனக் கதைகளில் சித்தரிக்கப்படுகிறார். இயற்கையையும், விலங்குகளையும் கட்டுப்படுத்தும் வலிமை உள்ளவர் எனக்கருதப்படும் இவரின் அபூர்வ சக்திகள் இவர் தந்தை ஒர் தேவன் என்பதனால் இவரிற்கு உரித்தாக கிடைத்தன.

விவியான் எனும் தேவதை மீது தீராக் காதலில் வீழ்ந்த மெர்லின், அவளிற்கு ஒர் மனிதனை நிரந்தரமாகக் கட்டிப்போடும் மந்திரத்தை சொல்லித்தர, மெர்லின் உறங்கிய போது அவனைச் சுற்றி ஒன்பது வளையங்களை வரைந்து விவியான் அம்மந்திரத்தை உச்சரிக்க, மெர்லின் மந்திரத்தில் இருந்து விடுபட முடியாது நிரந்தரமாக சிறையுண்டதாக ஒர் கதை கூறுகிறது. [மெர்லினிற்கு மட்டும்தானா இந்த நிலை....]

தேவர்கள், இயற்கை ரகசியங்கள், மாய உலகம் எனும் மாய ரசத்தில் தோய்ந்த சிறப்பான கதை சொல்லலும், தேவர்களையும், மாயஜாலங்களின் பிரம்மாண்டங்களையும், இயற்கை வனப்புக்களையும் கண் முன்னே விரியச் செய்திடும், மனதைக் கொள்ளை கொள்ளும் அருமையான சித்திரங்களும் காமிக்ஸ் தொடரின் வெற்றிக்கு அச்சாரம்.

தொடரிற்கு கதையை எழுதுபவர் Jean-luc Istin. ஒவியங்களின் பொறுப்பு Eric Lambert. இருவருமே பிரெஞ்சுக் கலைஞர்கள். 2000ம் ஆண்டிலிருந்து வெளியாக தொடங்கிய தொடரில் இது வரை ஒன்பது ஆல்பங்கள் வெளிவந்திருக்கின்றன. வாசகர்களிடம் தொடரிற்கு கிடைத்த வரவேற்பின் காரணமாக Merlin-La quete de l’épée [வாள் தேடும் படலம்] எனும் தொடரும் ஆரம்பமாகி இருக்கிறது. மாயஜாலக் கதைப் பிரியர்களின் இஷ்டமான கதைத் தொடராக இக்காமிக்ஸ் தொடர் மகுடம் சூட்டும் என்பது உறுதியான ஒன்று. [****]

ஏனைய ஆல்பங்கள்

வாழ்த்துக்கள்

தனது முதலாவது ஆண்டில் வெற்றிக் காலடி பதிக்கும் சிறந்த தமிழ் காமிக்ஸ் வலைப்பூவான அகொதீகவிற்கும் அதன் நிறுவனர் டாக்டர் செவனிற்கும் எங்கள் மனம் நிறைந்த வாழ்த்துக்கள்.

பாண்டி மைனரும், கார்லா சார்கோஸியின் முறைப் பையனும், தமிழ் கூறும் நல்லுலகின் பிராட் பிட்டுமான அன்பு நண்பர் கண்டால்ஃப் ஜோஸ் அவர்களிற்கு எங்கள் பிறந்த நாள் வாழ்த்துக்கள்.